मुंबईतील मुंबई शहरातील भांडुप पश्चिम येथील हनुमान नगर परिसरातील साई बजरंग गोविंदा पथक यांच्याकडून यंदाच्या दहावी (SSC) परीक्षार्थी विद्यार्थ्यांसाठी एक विशेष आणि कौतुकास्पद उपक्रम राबविण्यात आला आहे.
दहावीच्या परीक्षेला जाणाऱ्या विद्यार्थ्यांना परीक्षा केंद्रावर वेळेत पोहोचता यावे आणि प्रवासामुळे कोणताही ताण येऊ नये, यासाठी पथकाच्या वतीने खास वाहनाची व्यवस्था करण्यात आली आहे. सकाळच्या गर्दीच्या वेळेत होणारी वाहतूक कोंडी लक्षात घेता हा निर्णय घेण्यात आला असून विद्यार्थ्यांना सुरक्षित व वेळेवर परीक्षा केंद्रावर पोहोचविण्याची जबाबदारी पथकाने उचलली आहे.
या उपक्रमामुळे विद्यार्थ्यांसह पालकांमध्येही समाधानाचे वातावरण आहे. अनेक पालकांनी पथकाच्या या सामाजिक बांधिलकीचे कौतुक केले असून, “गणेशोत्सव आणि दहीहंडीपुरते मर्यादित न राहता समाजासाठी अशा प्रकारचे उपक्रम राबविणे ही खऱ्या अर्थाने सेवा आहे,” अशी प्रतिक्रिया व्यक्त केली.
पथकाचे प्रमुख यांनी सांगितले की,
“विद्यार्थ्यांचे भविष्य घडविण्यात समाजाचा सहभाग असावा, या उद्देशाने आम्ही हा छोटासा उपक्रम सुरू केला आहे. पुढील काळातही शैक्षणिक आणि सामाजिक क्षेत्रात आणखी उपक्रम राबविण्याचा आमचा मानस आहे.”
साई बजरंग गोविंदा पथकाच्या या प्रयत्नामुळे परिसरात सकारात्मक संदेश पसरला असून, इतर मंडळांनीही अशा सामाजिक उपक्रमांची प्रेरणा घ्यावी, अशी अपेक्षा व्यक्त केली जात आहे.
प्रतिनिधी: केतन सुनिल मोरे (ठाणे जिल्हा)
