के. के. एम. महाविद्यालयाच्या गुणवंत खेळाडू व प्रशिक्षकांचा विद्यापीठाच्या वतीने सत्कार
परभणी/प्रतिनिधी :- रमेश मुलगीर
आज दि. 25/2/2026 : के. के. एम. महाविद्यालय, मानवत येथील खो-खो खेळातील गुणवंत खेळाडू तसेच महाविद्यालयाचे क्रीडा संचालक व प्रशिक्षक डॉ. पवन पाटील यांचा स्वामी रामानंद तीर्थ मराठवाडा विद्यापीठ, नांदेड यांच्या वतीने सत्कार करण्यात आला. या प्रसंगी त्यांना मानचिन्ह, रोख पारितोषिक व ब्लेझर देऊन गौरविण्यात आले.
हा सत्कार समारंभ विद्यापीठात आयोजित करण्यात आला होता. क्रीडा महोत्सव, पश्चिम विभागीय आंतरविद्यापीठ स्पर्धा तसेच अखिल भारतीय आंतरविद्यापीठ खो-खो स्पर्धांमध्ये उल्लेखनीय कामगिरी करणाऱ्या विविध महाविद्यालयांतील पदक विजेत्या खेळाडूंचा यावेळी सन्मान करण्यात आला.
या कार्यक्रमाला विद्यापीठाचे कुलगुरू डॉ. मनोहर चासकर, प्र-कुलगुरू डॉ. अशोक महाजन, व्यवस्थापन परिषद सदस्य डॉ. नरेंद्र चव्हाण, व्यवस्थापन परिषद सदस्य डॉ. सूर्यकांत जोगदंड, अधीसभा सदस्य डॉ. महेश बेंबडे, क्रीडा संचालक डॉ. भास्कर माने, कुलसचिव डॉ. डी. डी. पवार तसेच इतर मान्यवर उपस्थित होते. त्यांच्या हस्ते खेळाडू व प्रशिक्षकांचा गौरव करण्यात आला.
के. के. एम. महाविद्यालयाच्या खो-खो संघाने विविध स्पर्धांमध्ये उल्लेखनीय कामगिरी केली आहे. या संघात ज्ञानेश्वर कावळे, शुभम थोरात, ओंकार बारहाते, अनिकेत चिद्रवार आणि सुफियान शेख या खेळाडूंनी उत्कृष्ट खेळ दाखवून पदके मिळवली. या सर्व खेळाडूंना डॉ. पवन पाटील यांनी प्रशिक्षण दिले असून त्यांच्या मार्गदर्शनाखाली संघाने उल्लेखनीय यश संपादन केले आहे.
डॉ. पवन पाटील यांनी विद्यार्थ्यांना उत्कृष्ट प्रशिक्षण देऊन महाविद्यालयाचे नाव विद्यापीठ स्तरावर उज्ज्वल केले असल्याने विद्यापीठाच्या वतीने त्यांना विशेष गौरविण्यात आले. यावेळी खेळाडूंनाही विशेष सन्मान प्रदान करण्यात आला.
या यशाबद्दल महाविद्यालयाचे प्राचार्य डॉ. भास्कर मुंडे यांचाही सत्कार करण्यात आला. महाविद्यालयातील विद्यार्थी, प्राध्यापक आणि क्रीडा विभागाकडून सर्व विजेत्या खेळाडू व प्रशिक्षकांचे अभिनंदन करण्यात आले.
या गौरवामुळे महाविद्यालयातील विद्यार्थ्यांना क्रीडा क्षेत्रात प्रगती करण्यासाठी प्रेरणा मिळत असून भविष्यातही अशाच यशाची अपेक्षा व्यक्त करण्यात आली.
