पनवेल ता प्रतिनिधी:-
पनवेल महानगरपालिका महिला व बालकल्याण विभागाच्या वतीने महापौर नितीन पाटील, उपमहापौर प्रमिला पाटील व आयुक्त मंगेश चितळे यांच्या मार्गदर्शनाखाली जागतिक महिला दिनानिमित्त ९ मार्च रोजी विशेष कार्यक्रमाचे आयोजन करण्यात येत आहे. या कार्यक्रमात पनवेल महानगरपालिका क्षेत्रातील विविध क्षेत्रांत उल्लेखनीय कार्य करणाऱ्या महिलांचा सन्मान करून गौरविण्यात येणार आहे.
या पार्श्वभूमीवर, पनवेल महानगरपालिका हद्दीत वास्तव्यास असलेल्या शिक्षण, समाजसेवा, आरोग्य, क्रीडा, कला, उद्योग, प्रशासन, पर्यावरण, महिला सक्षमीकरण तसेच इतर विविध क्षेत्रात उल्लेखनीय कामगिरी केलेल्या महिलांची माहिती मागविण्यात येत आहे.
उत्कृष्ट कामगिरी केलेल्या महिलांची माहिती महापालिकेने निर्धारित केलेल्या विहित नमुन्यात महिला व बालकल्याण विभागाकडे सादर करावी असे आवाहन महापालिकेच्या वतीने करण्यात आले आहे.
प्राप्त अर्जांमधून निवड करण्याचा अंतिम अधिकार निवड समिती सदस्यांना राहणार आहे. सदर अर्जाचा नमुना व सविस्तर माहिती www.panvelcorporation.com या संकेतस्थळावर उपलब्ध असल्याची माहिती अतिरिक्त आयुक्त महेशकुमार मेघमाळे यांनी दिली आहे.
