मोफत शिक्षणाच्या निर्णयाला हरताळ? नगर परिषद शाळेमध्ये अवैध बिनपावती शुल्क वसुलीचा आरोप
कलमेश्वर येथील नगर परिषद अंतर्गत चालणाऱ्या पी.एम. श्री म्युनिसिपल ज्युनिअर कॉलेजमध्ये शासनाच्या मोफत व सक्तीच्या शिक्षणाच्या निर्णयाला बाजूला ठेवून विद्यार्थ्यांकडून बेकायदेशीररीत्या पैसे वसूल केल्याचा गंभीर आरोप समोर आला आहे.
मिळालेल्या माहितीनुसार, सन २०१९ पासून आजपर्यंत दरवर्षी सुमारे २००० ते २२०० विद्यार्थ्यांकडून प्रत्येकी ७० ते ९० रुपये अशी रक्कम बिनपावती आकारण्यात आली. विशेष म्हणजे, ही रक्कम नगर परिषदेकडे जमा न करता तत्कालीन प्राचार्या पौर्णिमा मेश्राम यांनी स्वतःकडे ठेवल्याचा आरोप आहे.
विद्यार्थ्यांकडून ही रक्कम वर्गशिक्षकांच्या माध्यमातून गोळा करण्यात आली. काही विद्यार्थ्यांना परीक्षेला बसू देणार नाही, अशी भीती दाखवून मानसिक दबाव टाकण्यात आल्याची माहितीही समोर येत आहे.
शासनाने मोफत व सक्तीच्या शिक्षणाबाबत स्पष्ट निर्णय घेतलेले असताना अशा प्रकारे बेकायदेशीर शुल्क आकारणे हे गंभीर बाब मानली जात आहे. गेल्या पाच वर्षांपासून हा प्रकार सातत्याने सुरू असल्याने या प्रकरणाची सखोल चौकशी करून दोषींवर कारवाई करण्याची मागणी पालक व सामाजिक कार्यकर्त्यांकडून केली जात आहे.
या संदर्भात नगर परिषद प्रशासनाची अधिकृत भूमिका जाणून घेण्याचा प्रयत्न केला असता प्रतिसाद मिळू शकला नाही. दरम्यान, संबंधित अधिकाऱ्यांकडून चौकशी होऊन विद्यार्थ्यांकडून घेतलेली रक्कम परत मिळावी, अशी मगनी सामाजिक कार्यकर्ते व पालक करत आहे.
