🌈 🟣🔵 महाविद्यालयीन जीवनात सर्वगुण संपन्न व्हावे – डॉ. चंद्रकांत पोतदार 🔵🟣 🌈

कोवाड :
भाषा ही समाजाच्या उत्कर्षाची खरी शक्ती आहे. कोणतीही भाषा कनिष्ठ नसून ती त्या-त्या समाजासाठी श्रेष्ठच असते. मराठी साहित्यातील विचार, चिंतन आणि मूल्ये आत्मसात केली, तर आयुष्याला योग्य आकार देता येतो, असे प्रतिपादन महाराष्ट्रातील सुप्रसिद्ध कवी तथा विचारवंत डॉ. चंद्रकांत पोतदार यांनी केले. कोवाड येथील महाविद्यालयाच्या वार्षिक पारितोषिक वितरण समारंभात ते प्रमुख पाहुणे म्हणून बोलत होते. कार्यक्रमाच्या अध्यक्षस्थानी संस्थेचे अध्यक्ष मा. एम. व्ही. पाटील होते.
डॉ. पोतदार पुढे म्हणाले की, मराठी लेखकांच्या लेखणीतून उतरलेले स्वातंत्र्यगीत, समरगीते, लावणी, पोवाडे हे इतिहासाचे सजीव साक्षीदार आहेत; तर संतसाहित्यातून महाराष्ट्राने अध्यात्म आणि धर्ममूल्ये स्वीकारली आहेत. तरुण वय अतिशय नाजूक असते. या वयातच विद्यार्थ्यांनी स्वतःला सावरून जीवनाचा योग्य मार्ग निवडला पाहिजे. आई-वडील आणि गुरुजनांकडून मिळालेले संस्कार जपले, तर ते आयुष्यभर दिशा देतात.
डिजिटल युगातील यांत्रिकीकरणामुळे माणूस माणसापासून दूर जात आहे. त्यामुळे संवेदनशीलता टिकवण्यासाठी साहित्य, कला आणि संवाद आवश्यक आहेत. मनातील विचार व्यक्त करण्यासाठी विविध कला प्रकारांचा आधार घ्यावा, असे आवाहन त्यांनी केले. महाविद्यालयीन जीवनातच जीवनाचा पाया भक्कम करा; विविध विचारवंत, लेखक यांचे वाचन-पुनर्वाचन करा आणि त्यांच्या विचारांच्या दिशेने वाटचाल करा, असेही त्यांनी सांगितले.
छत्रपती शिवाजी महाराजांचे शिवचरित्र, सावित्रीबाई फुले, महात्मा फुले, राजर्षी शाहू महाराज, डॉ. बाबासाहेब आंबेडकर, वि. वा. शिरवाडकर, रणजित देसाई, वि. स. खांडेकर, भालचंद्र नेमाडे तसेच संतसाहित्य हे प्रेरणा व ऊर्जा देणारे असल्याचे त्यांनी अधोरेखित केले. बालवयातच छत्रपती शिवाजी महाराज यांनी स्वराज्याची मुहूर्तमेढ रोवली, तर प्रतिकूल परिस्थितीवर मात करत डॉ. बाबासाहेब आंबेडकरांनी जागतिक स्तरावर आपले स्थान निर्माण केले, याकडेही त्यांनी लक्ष वेधले.
कार्यक्रमाची सुरुवात छत्रपती शिवाजी महाराजांच्या प्रतिमेच्या पूजनाने झाली. प्राचार्य डॉ. व्ही. आर. पाटील यांनी प्रास्ताविकातून महाविद्यालयाच्या कार्याचा आढावा घेतला. पाहुण्यांची ओळख डॉ. आर. डी. कांबळे यांनी करून दिली. क्रीडा विभागाचा अहवाल प्रा. आर. टी. पाटील, तर सांस्कृतिक विभागाचा अहवाल डॉ. व्ही. के. दळवी यांनी सादर केला. अध्यक्षीय मनोगतात मा. एम. व्ही. पाटील यांनी विद्यार्थ्यांनी आपल्या सुप्त कलागुणांना वाव देऊन महाविद्यालयाचा लौकिक वाढवावा, असे आवाहन केले.
यावेळी अर्थशास्त्र विषयात पीएच.डी. पदवी प्राप्त केलेले माजी विद्यार्थी ज्ञानेश्वर पाथरवट यांचा विशेष सत्कार करण्यात आला. तसेच प्रा. आर. टी. पाटील आणि प्रा. ए. के. कांबळे यांना त्यांच्या शैक्षणिक कार्याबद्दल मिळालेल्या पुरस्कारांबद्दल सन्मानित करण्यात आले. वार्षिक क्रीडा, सांस्कृतिक, एनएसीएस व विविध उपक्रमांत यश मिळवलेल्या गुणवंत विद्यार्थ्यांना प्रमाणपत्रे व पुष्पगुच्छ देऊन गौरविण्यात आले. मराठी भाषा दिनाचे औचित्य साधून ‘सर्वोदय’ या भित्तिपत्रकाचे प्रकाशनही डॉ. चंद्रकांत पोतदार यांच्या हस्ते करण्यात आले.
दुपारी ‘कलारंग २०२६’ या विविध गुणदर्शन कार्यक्रमात नृत्याविष्कारांसह अनेक कलाप्रकारांचे सादरीकरण झाले. कार्यक्रमाचे सूत्रसंचालन डॉ. मोहन घोळसे आणि डॉ. सुनिता कांबळे यांनी केले, तर आभार डॉ. ए. के. कांबळे यांनी मानले.
या कार्यक्रमास शिक्षणप्रेमी, पत्रकार, ग्रामस्थ, विद्यार्थी, माजी विद्यार्थी संघटना, पालक, संस्थेचे पदाधिकारी, प्राध्यापक व कर्मचारी मोठ्या संख्येने उपस्थित होते.