शिरुर (प्रतिनिधी) – शिरुर शहरातील हुडको काॅलनी येथील तीन गतिरोधकांवर नियमांनुसार परावर्तित रंगकाम व सूचना फलक नसल्यामुळे अपघाताचा धोका वाढला असून आज स्थानिक नागरिकांनी शिरुर नगरपरिषद प्रशासनाकडे लेखी निवेदन देऊन तात्काळ कारवाईची मागणी केली आहे.
कॉलनीतील सनराईज कटिंग दुकानाजवळ, सुखकर्ता किराणा दुकानाजवळ आणि आदित्य सुपर मार्केटजवळ हे तीन गतिरोधक बसविण्यात आले आहेत. मात्र, या ठिकाणी आवश्यक काळे-पांढरे अथवा काळे-पिवळे परावर्तित पट्टे नसून “Speed Breaker Ahead” असा कोणताही सूचना फलक लावण्यात आलेला नाही. विशेषतः रात्रीच्या वेळी दुचाकीस्वारांना हे गतिरोधक स्पष्टपणे दिसत नसल्याने अचानक ब्रेक लावावे लागतात व अपघाताची शक्यता निर्माण होत आहे.
दिनांक २८ फेब्रुवारी २०२६ रोजी रात्री सुमारे ११:३० वाजण्याच्या सुमारास आदित्य सुपर मार्केटजवळील गतिरोधकावरून जात असताना एका दुचाकीस्वाराचा अपघात झाला. संबंधित व्यक्ती किरकोळ जखमी झाली असून सुदैवाने मोठी जीवितहानी टळली. या घटनेनंतर परिसरातील नागरिकांमध्ये भीतीचे वातावरण निर्माण झाले आहे.
नागरिकांचे म्हणणे आहे की, गतिरोधक बसविताना शासनाच्या नियमांनुसार उंची-रुंदीचे मापदंड, परावर्तित रंगकाम आणि पूर्वसूचना फलक लावणे बंधनकारक असते. मात्र येथे या नियमांचे पालन झालेले दिसत नाही. त्यामुळे संबंधित ठेकेदार व अधिकाऱ्यांची जबाबदारी निश्चित करून तातडीने दुरुस्ती करण्यात यावी, अशी मागणी निवेदनाद्वारे करण्यात आली आहे.
आज दिलेल्या निवेदनात पुढील मागण्या करण्यात आल्या आहेत —
1 तिन्ही ठिकाणी तात्काळ परावर्तित रंगकामकरणे. 2.प्रत्येक गतिरोधकापूर्वी आवश्यक सूचना फलक लावणे. 3.गतिरोधकांचे मापदंड नियमांनुसार तपासणे. 4.संबंधित ठेकेदारास लेखी सूचना देऊन दुरुस्तीचे आदेश देणे. 5.झालेल्या हलगर्जीपणाबाबत संबंधित अधिकारी व ठेकेदारांची जबाबदारी निश्चित करणे. 6.२८ फेब्रुवारी रोजी झालेल्या अपघाताची अधिकृत नोंद घेऊन भविष्यात अशा घटना टाळण्यासाठी प्रतिबंधात्मक उपाययोजना करणे.
नागरिकांच्या सुरक्षेच्या दृष्टीने या प्रकरणी शिरुर नगरपरिषद प्रशासनाने तात्काळ कार्यवाही करावी, अशी अपेक्षा स्थानिक रहिवाशांनी व्यक्त केली आहे.
