दापोली(लोणवडी) दि. २ मार्च २०२६ प्रतिनिधी:राकेश.चिलबे.लोणवडी गावची ग्रामदैवत आणि नवसाला पावणारी श्री काळेश्वरी माता यांची पारंपरिक पालखी आज पहाटे विधिवत पूजनानंतर भक्तांच्या भेटीसाठी गावभर निघाली.
सालाबादप्रमाणे यंदाही हा सोहळा मोठ्या भक्तिभावात आणि पारंपरिक उत्साहात पार पडला.गावचे पाटील श्री. योगेश यशवंत रहाटवळ यांच्या हस्ते देवीचे पूजन करण्यात आले. त्यानंतर ग्रामस्थांनी एकत्र येत पालखी धुवून स्वच्छ केली व पारंपरिक पद्धतीने सजावट करण्यात आली. खणा-नारळाने ओटी भरून गाऱ्हाणे घालत देवीची पालखी मंदिरात नेण्यात आली. तेथे धार्मिक विधी पूर्ण झाल्यानंतर माता भक्तांच्या भेटीसाठी गावभेटीस निघाली.
आज संपूर्ण गावातील घरांना पालखी भेट देणार असून, दुसऱ्या दिवशी ‘साना’ भरली जाणार आहे. उर्वरित घरांना त्यादिवशी भेट दिली जाईल. शिमगा उत्सवानिमित्त विविध पारंपरिक खेळ, नाच्या पोऱ्यांचे सादरीकरण तसेच तमाशाचे आयोजन करण्यात येत असून गावात सणासुदीचे वातावरण निर्माण झाले आहे.
मुंबईसह बाहेरगावी असलेले ग्रामस्थ देखील या सोहळ्यासाठी खास उपस्थित राहतात. पालखी सोबत ढोल-ताशांचा गजर, नृत्य आणि पारंपरिक तमाशामुळे लोणवडी गावात भक्ती आणि उत्साहाचा संगम अनुभवायला मिळत आहे.
लोणवडीतील नवसाला पावणारी श्री काळेश्वरी माता पालखी सोहळा उत्साहात; शिमगोत्सवाला भक्तीचा जल्लोष
