पनवेल – कळंबोली ता प्रतिनिधी:- पनवेल महापालिकेच्या कळंबोलीतील प्रभाग क्रमांक 8 चे भाजप नगरसेवक श्री. बबन मुकादम यांनी नागरिकांच्या समस्या जाणून घेण्यासाठी कळंबोलीतील प्रभाग क्र. ०८ मधील ससून सभागृह,साईनगर, सेक्टर -4 येथे रविवार १ मार्च २०२६ रोजी जनता दरबाराचे आयोजन केले होते. या जनता दरबाराला विविध सोसायट्यांचे प्रमुख पदाधिकारी व नागरिक मोठ्या संख्येने उपस्थित होते. तसेच प्रभागातील महिलावर्गही मोठ्या संख्येने सहभागी झाले होते.
यावेळी उपस्थित नागरिकांनी अनेक
नागरी समस्यांबाबत आपली मते मांडून त्या सोडवण्यास प्राधान्य देण्याची मागणी केली. प्रभागातील रस्ते, पाणीपुरवठा, गटार, सिव्हरेज लाईन, तसेच रस्त्यावरील दिवे आदी अनेक प्रश्न नागरिकांनी मांडले.
त्यानुसार आमदार प्रशांत ठाकूर यांच्या मार्गदर्शनाखाली अधिकाधिक चांगल्या नागरी सुविधा देण्यासाठी आगामी काळात महापालिकेच्या माध्यमातून प्रयत्न करणार असल्याचे ठोस आश्वासन यावेळी नगरसेवक बबन मुकादम यांनी उपस्थित यांना दिले.
उपस्थित नागरिकांच्या समस्या लेखी व तोंडी स्वरूपात जाणून घेऊन त्या सर्व नोंदवून घेण्यात आल्या असून या समस्यांचे निराकरण महानगरपालिकेच्या माध्यमातून करण्याचा प्रयत्न करण्यात येणार असून, आवश्यकतेनुसार आमदार प्रशांत ठाकूर यांच्या माध्यमातूनही त्या सोडवण्यासाठी पाठपुरावा केला जाणार असल्याचे भाजप नगरसेवक श्री बबन मुकादम यांनी सांगितले.
यावेळी उपस्थित असलेल्या महिलांसाठी चारचाकी वाहन चालविण्याच्या प्रशिक्षणासाठी अर्जाचे वाटप करण्यात आले. महानगरपालिकेच्या महिला व बालकल्याण समितीमार्फत ही योजना राबविण्यात येणार असून, पात्र महिलांनी अर्ज भरल्यानंतर त्यांचे प्रशिक्षण कळंबोली येथेच दिले जाईल, असे आश्वासन देण्यात आले. तसेच वैद्यकीय शिक्षण(MBBS ,BHMS, BDS)घेत असलेल्या मुलींसाठी महिला व बालकल्याण समितीच्या माध्यमातून अनुदान देण्यात येणार असल्याची माहिती देण्यात आली. संबंधित अर्ज महानगरपालिकेत जमा करून विद्यार्थिनींना अनुदान मिळवून देण्याचा प्रयत्न केला जाईल असे यावेळी सांगण्यात आले.
