पनवेल : प्रतिनिधी
होळीच्या सणानिमित्त प्रसाद म्हणून पुरणपोळी अग्नीत अर्पण करण्याऐवजी ती गरिबांच्या पोटातील भूक भागविण्यासाठी वापरावी, या संवेदनशील संकल्पनेतून पनवेल पत्रकार मित्र असोसिएशन तर्फे ‘एक पोळी गरिबांसाठी’ हा उपक्रम राबविण्यात आला. संस्थापक अध्यक्ष केवल महाडिक यांच्या पुढाकारातून गेल्या ९ वर्षांपासून हा सामाजिक उपक्रम सातत्याने साजरा केला जात आहे.
होळीच्या दिवशी पनवेल, नवीन पनवेल व तक्का परिसरातील गरजू, निराधार आणि गोरगरीब नागरिकांना पुरणपोळीचे वाटप करण्यात आले. “सणाचा गोडवा सर्वांच्या आयुष्यात यावा” या उद्देशाने हा उपक्रम राबविण्यात आला.
होळीच्या दिवशी अनेक घरांमध्ये गोडधोड केले जाते, तसेच काही ठिकाणी प्रसाद म्हणून पुरणपोळी अग्नीत टाकली जाते. मात्र यामुळे अन्नाचा अपव्यय होतो, तर दुसरीकडे अनेक गरिबांना सणासुदीच्या दिवशीही उपाशी राहावे लागते. ही सामाजिक विषमता लक्षात घेऊन प्रत्येक गरिबालाही होळीच्या निमित्ताने गोडधोड खायला मिळावे, या चांगल्या हेतूने ‘एक पोळी गरिबांसाठी’ हा उपक्रम सुरू करण्यात आला आहे.
या वेळी संस्थापक अध्यक्ष केवल महाडिक, कार्याध्यक्ष नितीन जोशी, शशिकांत दळवी, अनुराग वाघचौरे, विशाल गर्ग, निलेश भाऊ परिवार तसेच संस्थेचे इतर सदस्य उपस्थित होते.
या उपक्रमातून सण साजरा करण्याचा वेगळा आणि समाजाभिमुख आदर्श पनवेलकरांसमोर ठेवण्यात आला आहे.
