रायगड-पनवेल ता प्रतिनिधी— मुख्यमंत्री माझी लाडकी बहीण योजनेअंतर्गत पात्र लाभार्थी महिलांनी e-KYC प्रक्रिया पूर्ण केली असली तरी, काही लाभार्थींनी माहिती भरताना नजरचुकीने चुकीचा पर्याय निवडल्याचे निदर्शनास आले आहे. विशेषतः कुटुंबातील सदस्य सरकारी विभाग, उपक्रम, मंडळ, भारत सरकार किंवा राज्य सरकारच्या स्थानिक संस्थेत नियमित/कंत्राटी कर्मचारी म्हणून कार्यरत आहेत का किंवा सेवानिवृत्तीनंतर निवृत्तीवेतन घेत आहेत का, या बाबत चुकीची नोंद झाल्याची प्रकरणे आढळली आहेत.
अशा लाभार्थी महिलांना त्यांच्या अर्जातील माहिती दुरुस्त करण्यासाठी ऑनलाईन माध्यमातून पुन्हा एकदा संधी देण्यात आली आहे. ही सुधारणा करण्याची सुविधा दि. ३१ मार्च २०२६ पर्यंत उपलब्ध राहणार असून याबाबतचा शासन निर्णय दि. ६ फेब्रुवारी २०२६ रोजी निर्गमित करण्यात आला आहे.
या अनुषंगाने योजनेच्या पोर्टलवर आवश्यक तांत्रिक सुधारणा करण्यात आल्या आहेत. संबंधित लाभार्थी महिलांनी दिलेल्या कालावधीत आपली माहिती तपासून आवश्यक दुरुस्ती करावी, असे आवाहन जिल्हा महिला व बाल विकास अधिकारी श्रीकांत हावळे यांनी केले आहे.
