श्रीगोंदा प्रतिनिधी सत्यवान शिंदे| दि. ६ मार्च २०२६अहिल्यानगर जिल्ह्यातील श्रीगोंदा शहरातील सुरू असलेल्या आणि प्रलंबित विकासकामांचा आढावा घेण्यासाठी एक महत्त्वपूर्ण बैठक आयोजित करण्यात आली.
या बैठकीचे नेतृत्व माजी मंत्री बबनराव पाचपुते यांनी केले. नगर परिषदेचे नवनिर्वाचित नगराध्यक्ष, उपनगराध्यक्ष आणि नगरसेवक यावेळी उपस्थित होते. शहराच्या विकासाशी संबंधित विविध मुद्द्यांवर सविस्तर चर्चा करण्यात आली.बैठकीत शहरातील रस्ते दुरुस्ती, पाणीपुरवठा व्यवस्था, गटारी व जलनिस्सारण, स्वच्छता आणि प्रकाशयोजना अशा मूलभूत सुविधांशी संबंधित कामांचा आढावा घेण्यात आला.
काही ठिकाणी कामांची गती कमी असल्याचे लक्षात आल्याने संबंधित विभागांना कामे जलदगतीने पूर्ण करण्याच्या सूचना देण्यात आल्या. तसेच रखडलेल्या कामांची जबाबदारी निश्चित करून ती ठरावीक कालमर्यादेत पूर्ण करण्यावर भर देण्यात आला.यावेळी नव्याने प्रस्तावित होणाऱ्या विकासकामांमध्ये दर्जेदार कामकाजाला प्राधान्य द्यावे, उपलब्ध निधीचा योग्य व पारदर्शक वापर करावा आणि कामांमध्ये कोणतीही त्रुटी राहू नये, याबाबतही विशेष मार्गदर्शन करण्यात आले.
नागरिकांना आवश्यक त्या मूलभूत सुविधा वेळेत मिळणे ही नगर परिषदेची जबाबदारी असल्याचेही पाचपुते यांनी अधोरेखित केले.शहराच्या प्रगतीसाठी प्रशासन आणि लोकप्रतिनिधी यांच्यात सुसंवाद आणि समन्वय असणे अत्यावश्यक असल्याचे त्यांनी सांगितले. नागरिकांच्या अडचणी समजून घेऊन त्यांचे त्वरित निराकरण करण्यासाठी प्रभावी यंत्रणा उभारण्याच्या सूचनाही देण्यात आल्या.
या बैठकीनंतर शहरातील विकासकामांना अधिक गती मिळेल, अशी अपेक्षा उपस्थितांकडून व्यक्त करण्यात आली.
