नितेश गट्टीवार चामोर्शी (गडचिरोली): दि.९ मार्च गडचिरोली जिल्ह्यात मोठ्या प्रमाणात पेट्रोल पंप सुरू आहेत. मात्र अनेक पेट्रोल पंपांवर मूलभूत सुविधा उपलब्ध नसल्यामुळे वाहनधारक, प्रवासी तसेच नागरिकांना मोठ्या अडचणींचा सामना करावा लागत आहे. विशेषतः शौचालय, बाथरूम व पिण्याच्या फिल्टर पाण्याची व्यवस्था नसल्याने नागरिकांची गैरसोय होत असल्याचे समोर आले आहे.याबाबत काँग्रेस सोशल मीडिया प्रमुख विजय लाड यांनी प्रशासनाचे लक्ष वेधले असून सर्व पेट्रोल पंपांवर आवश्यक सुविधा उपलब्ध करून देण्याची मागणी केली आहे. महामार्ग व ग्रामीण भागातील पेट्रोल पंपांवर महिलांना, ज्येष्ठ नागरिकांना व लहान मुलांना सर्वाधिक त्रास सहन करावा लागत आहे. अनेक ठिकाणी शौचालये असली तरी ती बंद अवस्थेत किंवा अस्वच्छ असल्याचेही दिसून येते.म्हणूनच संबंधित विभागाने सर्व पेट्रोल पंपांची तपासणी करून स्वच्छ शौचालय, बाथरूम आणि थंड फिल्टर पाण्याची व्यवस्था अनिवार्य करावी, तसेच नियमांचे पालन न करणाऱ्या पेट्रोल पंप चालकांवर कारवाई करावी, अशी मागणी विजय लाड यांनी केली आहे.नागरिकांना मूलभूत सुविधा मिळणे हा त्यांचा हक्क असून प्रशासनाने याकडे तातडीने लक्ष देऊन योग्य ती कार्यवाही करावी, अशी अपेक्षा व्यक्त केली जात आहे.
