🟥 🔴 आकाशाला गवसणी!🟦 चंदगडचा सुपुत्र श्रेयस पाटील ‘फ्लाईंग ऑफिसर’🟩 सहाव्या प्रयत्नात एनडीएत यश; धुमडेवाडी गावासह चंदगड तालुक्याचा अभिमान ✈️🇮🇳

चंदगड :
परंपरा, संस्कृती आणि कष्टाळूपणासाठी ओळखल्या जाणाऱ्या चंदगड तालुक्यातील धुमडेवाडी या छोट्याशा गावाने आज अभिमानाचा ऐतिहासिक क्षण अनुभवला आहे. येथील प्राचार्य आर. पी. पाटील (दि न्यू इंग्लिश स्कूल व न. भु. पाटील ज्युनियर कॉलेज, चंदगड) आणि सौ. अनिता पाटील (विवेक इंग्लिश मिडीयम स्कूल, हलकर्णी) यांचे सुपुत्र कु. श्रेयस पाटील यांची भारतीय वायुदलात फ्लाईंग ऑफिसर (क्लास वन अधिकारी) म्हणून निवड झाली आहे. बेंगळुरू येथे पार पडलेल्या भव्य शपथविधी सोहळ्यात त्यांनी देशसेवेची शपथ घेतली.
दीड वर्षांच्या कठोर, शिस्तबद्ध आणि आव्हानात्मक प्रशिक्षणानंतर श्रेयस पाटील यांची क्षेपणास्त्र विभागात नियुक्ती झाली आहे. विशेष म्हणजे चंदगड तालुक्यातून फ्लाईंग ऑफिसर पदावर निवड होणारे ते पहिले तरुण ठरले असून त्यांच्या या उल्लेखनीय यशामुळे संपूर्ण तालुक्यात अभिमानाची भावना व्यक्त होत आहे.
श्रेयस पाटील यांनी आपले प्राथमिक व माध्यमिक शिक्षण विवेक इंग्लिश मिडीयम स्कूल, हलकर्णी येथे पूर्ण केले. त्यानंतर सायरस पुणावाला कॉलेज, पेठ वडगाव येथे बारावीपर्यंतचे शिक्षण घेत असतानाच त्यांनी एन.डी.ए.ची तयारी सुरू केली. सुरुवातीच्या काही प्रयत्नांमध्ये अपयश आले, मात्र अपयशाने खचून न जाता त्यांनी जिद्द, चिकाटी आणि आत्मविश्वासाच्या बळावर प्रयत्न सुरूच ठेवले.
पुढे पुण्यात अभियांत्रिकी शिक्षण घेत असताना त्यांनी आपले ध्येय डोळ्यांसमोर ठेवून अभ्यास आणि तयारी कायम ठेवली. अखेर सहाव्या प्रयत्नात एन.डी.ए. परीक्षा उत्तीर्ण होत त्यांनी भारतीय वायुदलात प्रवेश मिळवला आणि आपल्या स्वप्नाला यशाचे पंख दिले.
शांत, नम्र आणि संयमी स्वभावामुळे श्रेयस यांनी शिक्षक व मित्रपरिवाराचे मन जिंकले आहे. आपल्या मुलाच्या यशाबद्दल बोलताना वडील प्राचार्य आर. पी. पाटील भावूक होत म्हणाले, “हा माझ्या आयुष्यातील सुवर्ण क्षण आहे. मुलाच्या जिद्दीने, चिकाटीने आणि कठोर परिश्रमांनी हे स्वप्न साकार झाले.”
श्रेयस पाटील यांच्या या यशामुळे धुमडेवाडी गावासह संपूर्ण चंदगड तालुक्यात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे. त्यांच्या यशाने तरुणांसमोर एक प्रेरणादायी संदेश दिला आहे —
“अपयश आले तरी हार मानू नका; जिद्द आणि चिकाटीने आकाशही गाठता येते.” ✈️🇮🇳