जळकोट (प्रतिनिधी) : जळकोट पंचायत समितीच्या सभापतीपदी काँग्रेसच्या सुनीता संभाजी कोसंबे तर उपसभापतीपदी प्रा. माधव जळबा वाघमारे यांची बिनविरोध निवड करण्यात आली.
पंचायत समितीच्या सभागृहात तहसीलदार तथा पिठासीन अधिकारी राजेश लांडगे आणि गटविकास अधिकारी नरेंद्र मेढेवार यांच्या उपस्थितीत पंचायत समिती सदस्यांची बैठक पार पडली. सभापती व उपसभापती पदासाठी प्रत्येकी एकच अर्ज प्राप्त झाल्याने पिठासीन अधिकारी राजेश लांडगे यांनी दोन्ही पदांसाठी बिनविरोध निवड झाल्याची घोषणा केली.
जळकोट पंचायत समितीत एकूण सहा सदस्य असून त्यापैकी काँग्रेसचे चार तर राष्ट्रवादी काँग्रेसचे दोन सदस्य निवडून आले आहेत. त्यामुळे बहुमत काँग्रेसकडे असल्याने सभापती व उपसभापती पदे काँग्रेसकडे गेली. या निवडीमुळे पंचायत समितीवर पुन्हा काँग्रेसचा झेंडा फडकला आहे.
निवडीनंतर नूतन सभापती व उपसभापती यांचा पिठासीन अधिकारी राजेश लांडगे यांच्या हस्ते सत्कार करण्यात आला. यावेळी जिल्हा परिषद सदस्य नागेश्वरी सचिन केंद्रे, शांताबाई अदावळे, प्रशासन अधिकारी सचिन काडवदे तसेच पंचायत समितीचे सर्व सदस्य उपस्थित होते.
त्यानंतर काँग्रेसचे तालुका अध्यक्ष मारोती पांडे, कल्याण पाटील, शिलताई पाटील, बाबुराव जाधव, आशिष पाटील, दत्ता पवार, महेश धुळशेटे, सचिन केंद्रे, मेहताब बेग, यंकटराव केंद्रे, बालाजी ताकबीडे, रमण अदावळे, नूर पठाण, संभाजी कोसंबे, अक्षय बडगिरे, गणेश रेकुलवाड, माजी प्राचार्य तोडकर सर, महाराष्ट्र प्रदेश असंघटित कामगार काँग्रेसचे तालुका अध्यक्ष कैलास सोमूसे, गोविंद कोकणे, प्रशांत घोडके, प्रवीण ठाकूर आदींसह काँग्रेस पदाधिकारी व कार्यकर्त्यांनी फटाके फोडून व गुलाल उधळून आनंदोत्सव साजरा केला.
