दर्यापूर / प्रतिनिधी :
जागतिक महिला दिनाचे औचित्य साधून सार्वजनिक आरोग्य विभागांतर्गत राबविण्यात येणाऱ्या एचपीव्ही (HPV) लसीकरण मोहिमेच्या अनुषंगाने दर्यापूर येथील उपजिल्हा रुग्णालयात HPV लसीकरण कक्षाचे उद्घाटन करण्यात आले. दर्यापूर विधानसभा क्षेत्राचे आमदार मा. श्री. गजाननभाऊ लवटे यांच्या अर्धांगिनी सौ. ज्योतीताई लवटे यांच्या शुभहस्ते हा उद्घाटन सोहळा संपन्न झाला.
यावेळी सौ. ज्योतीताई लवटे यांनी उपस्थित महिलांना जागतिक महिला दिनाच्या हार्दिक शुभेच्छा देत एचपीव्ही लसीकरणाचे महत्त्व पटवून दिले. गर्भाशयमुख कर्करोगापासून संरक्षणासाठी ही लस अत्यंत उपयुक्त असून पात्र मुलींनी आणि महिलांनी या लसीकरणाचा लाभ घ्यावा, असे आवाहन त्यांनी केले.
यावेळी दर्यापूर उपजिल्हा रुग्णालयाचे वैद्यकीय अधीक्षक डॉ. डाबेराव यांनी उपस्थितांना एचपीव्ही लसीकरणाबाबत सविस्तर माहिती देत मार्गदर्शन केले. त्यांनी सांगितले की, ही लसीकरण मोहीम प्रामुख्याने ९ ते १४ वयोगटातील मुलींसाठी राबविण्यात येत असून गर्भाशयमुख कर्करोगापासून बचाव करण्यासाठी ही लस प्रभावी ठरते.
राज्यभरात जागतिक महिला दिनाच्या निमित्ताने या मोहिमेचा शुभारंभ करण्यात आला असून दर्यापूर उपजिल्हा रुग्णालयात सुरू झालेल्या या HPV लसीकरण कक्षामुळे स्थानिक स्तरावर महिलांच्या आरोग्याबाबत जागरूकता वाढण्यास मदत होणार आहे.
महिलांच्या आरोग्य संरक्षणासाठी ही लसीकरण मोहीम अत्यंत महत्त्वाची असल्याचे सांगत समाजातील सर्व पात्र मुली व महिलांनी या मोहिमेचा लाभ घ्यावा, असे आवाहन यावेळी करण्यात आले. अधिक माहितीसाठी स्थानिक आरोग्य केंद्र किंवा उपजिल्हा रुग्णालयाशी संपर्क साधण्याचेही सांगण्यात आले.
या कार्यक्रमास खासदार बळवंतभाऊ वानखडे यांच्या अर्धांगिनी सौ. मंदाकिनीताई वानखडे, युवासेना जिल्हाप्रमुख अंकुशभाऊ कावडकर, शिवसेना जिल्हा समन्वयक प्रदीपभाऊ वडतकर, दर्यापूर विधानसभा संघटक बबनराव विल्हेकर, शिवसेना शहरप्रमुख गोपालभाऊ अग्रवाल, युवासेना सर्कल प्रमुख आशिषभाऊ लायले, महिला आघाडीच्या उपजिल्हाप्रमुख सौ. वर्षाताई भोंडे, सौ. डॉ. भावनाताई भुतडा यांच्यासह उपजिल्हा रुग्णालयातील डॉक्टर, परिचारिका, आरोग्य कर्मचारी, आशा वर्कर आणि महिला नागरिक मोठ्या संख्येने उपस्थित होते.
