नितेश गट्टीवार चामोर्शी(गडचिरोली):दि.११ मार्च-चामोर्शी येथील नगर पंचायत प्रशासनाकडून होणाऱ्या पाणीपुरवठ्याच्या शुद्धतेबाबत पुन्हा एकदा गंभीर प्रश्नचिन्ह निर्माण झाला आहे. चामोर्शी शहराच्या आंबेडकर वॉर्ड क्रमांक ७ मध्ये आज, दि.बुधवारी सकाळी नळाच्या पाण्यात चक्क ‘नारू’ सदृश कीडा आढळल्याने परिसरात मोठी खळबळ उडाली आहे. या घटनेमुळे नागरिकांच्या आरोग्याला धोका निर्माण होणार असल्याची शक्यता नाकारता येत नाही.
मिळालेल्या माहितीनुसार, आंबेडकर वॉर्डातील रहिवासी धनराज कोटांगले हे आज सकाळी नेहमीप्रमाणे नळाला पाणी आले असता पाणी भरत होते. त्या दरम्यान, नळाच्या धारुकीतून पाण्यासोबत एक लांब, पांढरट रंगाचा जिवंत कीडा (नारू) बादलीत पडल्याचे त्यांच्या निदर्शनास आले. हा प्रकार पाहून त्यांनी तातडीने शेजारील नागरिकांना बोलावले. नळाच्या थेट पाण्यात अशा प्रकारे आरोग्यास घातक जीव आढळल्याने संपूर्ण वॉर्डात भीतीचे वातावरण पसरले आहे.नारू हा प्रामुख्याने दूषित पाण्यातून होणारा आजार पसरवण्यासाठी कारणीभूत ठरतो.
एकेकाळी देशातून हद्दपार झालेला हा आजार पुन्हा डोके वर काढत आहे का . असा प्रश्न यानिमित्ताने उपस्थित होत आहे. नळावाटे अशा प्रकारचे जीव बाहेर येणे, हे जलशुद्धीकरण केंद्र किंवा पाईपलाईनमध्ये मोठ्या प्रमाणात अस्वच्छता असल्याचे निदर्शक आहे. प्रशासनाकडून शुद्ध पाण्याचा दावा केला जात असला तरी, या प्रत्यक्ष घटनेने तो दावा फोल ठरवला आहे.या घटनेनंतर वॉर्डातील नागरिकांनी नगर परिषद प्रशासनाकडे तीव्र नाराजी व्यक्त केली आहे. “आम्ही पिण्यास हेच पाणि वापरतो, जर असे जंतू पाण्यात येत असतील तर आमच्या मुलाबाळाच काय असा सवाल नागरिक विचारत आहेत . नगर प्रशासनाने तात्काळ जलकुंभाची स्वच्छता करावी, ब्लिचिंग पावडरचा योग्य वापर करावा आणि पाणीपुरवठा करणाऱ्या पाईपलाईनची तपासणी करावी, अशी मागणी नागरिकांकडून होत आहे.
