नागपूर (प्रतिनिधी) : विदर्भातील ज्येष्ठ नेते, माजी खासदार दत्ताजी मेघे यांचे रविवारी (दि. २२ मार्च २०२६) नागपूर येथील निवासस्थानी रात्री सुमारे ८ वाजता वृद्धापकाळाने निधन झाले. त्यांच्या निधनाने राजकीय, शैक्षणिक व सामाजिक क्षेत्रात शोककळा पसरली आहे.
त्यांचे पार्थिव नागपूर येथे ठेवण्यात आले असून सोमवारी दुपारी १ वाजता ते वर्धा येथे रवाना करण्यात येणार आहे. दुपारी २.३० वाजता सावंगी (मेघे) येथे नागरिकांच्या अंतिम दर्शनासाठी पार्थिव ठेवण्यात येणार आहे.
त्यानंतर सायंकाळी ४.३० वाजता पवनार येथील त्यांच्या शेतात अंत्यसंस्कार करण्यात येणार आहेत. त्यांच्या निधनाने वर्धा जिल्ह्यातील एक मोठी पोकळी निर्माण झाली असून विविध स्तरांतून शोक व्यक्त केला जात आहे.
