आष्टा (प्रतिनिधी) : आष्टा येथील आर्ट्स, कॉमर्स व सायन्स महाविद्यालयाच्या लोकनेते राजाराम बापू पाटील सभागृहात आयडियल स्पोर्ट्स अकॅडमीच्या वतीने गुणवंतांचा सत्कार व तायक्वांदो मॅट पूजन कार्यक्रम उत्साहात पार पडला. या कार्यक्रमाचे आयोजन अकॅडमीचे सचिव आशितोष पाटील यांच्या पुढाकारातून महाविद्यालयाच्या सहकार्याने करण्यात आले.
कार्यक्रमास प्रमुख पाहुण्या म्हणून अधिकारी रेश्मा माने उपस्थित होत्या, तर अध्यक्षस्थानी कासेगाव एज्युकेशन सोसायटीचे सचिव व प्राचार्य आर. डी. सावंत होते. प्रारंभी मान्यवरांचा सत्कार करण्यात आला.
यावेळी बोलताना रेश्मा माने यांनी महिलांसाठी स्वसंरक्षण प्रशिक्षणाचे महत्त्व अधोरेखित करत, लहान मुलांपासून महाविद्यालयीन विद्यार्थ्यांपर्यंत तायक्वांदो, वुशु व स्केटिंगचे प्रशिक्षण देणाऱ्या अकॅडमीच्या कार्याचे कौतुक केले. तसेच स्वर्गीय कपिल बोते यांच्या कार्याचाही त्यांनी गौरव केला.
अध्यक्षीय भाषणात प्राचार्य आर. डी. सावंत यांनी महाविद्यालयाच्या ऐतिहासिक परंपरेचा उल्लेख करत, या परिसरातून अनेक खेळाडू राष्ट्रीय व आंतरराष्ट्रीय स्तरावर यशस्वी होत असल्याचे सांगितले.
यावेळी प्राचार्य डॉ. अरुण पाटील, डॉ. प्रज्ञा पाटील, सांगली जिल्हा तायक्वांदो असोसिएशनचे सचिव सुरेश चौधरी यांच्यासह अनेक मान्यवरांनी मनोगत व्यक्त केले. कार्यक्रमात तायक्वांदो, वुशु व स्केटिंगमध्ये तालुका, राज्य व राष्ट्रीय स्तरावर यश मिळवलेल्या विद्यार्थ्यांचा तसेच सेल्फ डिफेन्स प्रशिक्षण घेतलेल्या मुलींचा सत्कार करण्यात आला.
तायक्वांदो खेळाडूंनी सादर केलेल्या प्रात्यक्षिकांनी उपस्थितांची मने जिंकली. कार्यक्रमास नगरसेवक व इतर मान्यवरांसह पालकांची मोठ्या संख्येने उपस्थिती होती. कार्यक्रमाचे संयोजन अमृत डवंग व निलेश पाटील यांनी केले, तर आभार प्रदर्शन प्रा. प्रमोद कुचीवाले यांनी केले.
