भडगाव (प्रतिनिधी) — शहरातील जुन्या पारोळा रस्त्यावर पोलिसांनी कारमधून अमली पदार्थ जप्त करत एका महिलेसह दोघांना अटक केली. या कारवाईमुळे तालुक्यात खळबळ उडाली असून, भडगावात प्रथमच अशा प्रकारे ड्रग्स प्रकरण उघडकीस आले आहे.
मिळालेल्या गुप्त माहितीनुसार, पारोळा येथून फीस्टा कार (क्र. MH 01 BB 2216) मधून अमली पदार्थांचा साठा भडगावकडे येत असल्याची माहिती पोलिसांना मिळाली होती. त्यानुसार पोलिसांनी जुन्या पारोळा रोडवरील पाण्याच्या टाकीजवळ सापळा रचला. दुपारी सुमारे ४ वाजता संशयित कार अडवून तपासणी केली असता, त्यात १० पुड्या एमडी (ड्रग्स) आढळून आल्या.
या प्रकरणी योगेश हरी चौधरी व सरगम हरी चौधरी (रा. पारोळा, सध्या भडगाव) यांना ताब्यात घेण्यात आले असून कारही जप्त करण्यात आली आहे. जप्त केलेल्या पदार्थाची खातरजमा करण्यासाठी जळगाव येथील फॉरेन्सिक टीमला पाचारण करण्यात आले.
या घटनेनंतर भडगाव तालुक्यात अमली पदार्थ तस्करीचा पहिलाच प्रकार समोर आल्याने पोलीस प्रशासन सतर्क झाले आहे. या प्रकरणामागे मोठे रॅकेट असण्याची शक्यता असून पोलिसांकडून पुढील तपास सुरू आहे.
