उदगीर — उदगीर तालुक्यातील सुकणी येथे श्री रामनवमीच्या निमित्ताने अखंड हरिनाम सप्ताहाचे भव्य आयोजन करण्यात आले असून, हा सप्ताह चैत्र शुद्ध १ (दि. १९ मार्च २०२६) ते चैत्र शुद्ध ९ (दि. २७ मार्च २०२६) या कालावधीत भक्तिभावाने सुरू आहे.
या सप्ताहात ह.भ.प. दिनेश महाराज भुसणीकर, दयानंद माने (धाराशिवकर), राजेश पाटील (गुंजरगेकर), ज्योतीताई धनाडे (जालना) यांचे कीर्तन पार पडले आहे. तसेच पुढील दिवसांत ह.भ.प. प्रशांत महाराज बलसुरकर, माऊली महाराज आरबुजवाडीकर, संगीताई कोरडे (माजलगाव), सुदाम महाराज (पिंपळदरीकर), महेश भांदर्गे (महापुरकर) तसेच काल्याचे कीर्तन ह.भ.प. सुरेंद्र महाराज गुऱ्हाळकर यांचे होणार आहे.
याशिवाय भागवत कथा ह.भ.प. जनाताई भांदर्गे यांच्याकडून सुरू असून, काल कृष्ण जन्मोत्सव सोहळा उत्साहात पार पडला. कीर्तन सेवेने संपूर्ण परिसर भक्तिमय झाला असून मृदंगवादक प्रेमनाथ बालाजी मुळे व गायनाचार्य अवधूत अरुण सुकणे यांनी उपस्थितांना मंत्रमुग्ध केले.
या सप्ताहासाठी सुकणीसह परिसरातील भाविक मोठ्या संख्येने उपस्थित राहत असून, सर्वांनी या धार्मिक सोहळ्याचा लाभ घ्यावा, असे आवाहन आयोजकांनी केले आहे.
