आष्टा (प्रतिनिधी) : आष्टा येथील आर्ट्स, कॉमर्स व सायन्स महाविद्यालयाच्या लोकनेते राजाराम बापू पाटील सभागृहात आयडियल स्पोर्ट्स अकॅडमीच्या वतीने गुणवंतांचा सत्कार व तायक्वांदो मॅट पूजन कार्यक्रम उत्साहात पार पडला. हा कार्यक्रम अकॅडमीचे सचिव आशितोष पाटील यांच्या पुढाकाराने आणि महाविद्यालयाच्या सहकार्याने आयोजित करण्यात आला होता.
या कार्यक्रमास प्रमुख पाहुण्या म्हणून रेश्मा माने उपस्थित होत्या, तर अध्यक्षस्थानी कासेगाव एज्युकेशन सोसायटीचे सचिव व प्राचार्य आर. डी. सावंत होते.
प्रारंभी आशितोष पाटील यांच्या हस्ते मान्यवरांचा सत्कार करण्यात आला. यावेळी रेश्मा माने यांनी महिलांसाठी स्वसंरक्षणाचे महत्त्व अधोरेखित करत तायक्वांदो, वुशु व स्केटिंगसारख्या क्रीडाप्रकारांचे प्रशिक्षण लहान वयापासून देणे ही अत्यंत स्तुत्य बाब असल्याचे नमूद केले. त्यांनी स्वर्गीय कपिल बोते यांच्या कार्याचाही उल्लेख करत अकॅडमीच्या उपक्रमांचे कौतुक केले.
अध्यक्षीय भाषणात आर. डी. सावंत यांनी महाविद्यालयाच्या ऐतिहासिक पार्श्वभूमीचा उल्लेख करत राजाराम बापू पाटील, यशवंतराव चव्हाण व वसंतदादा पाटील यांच्या हस्ते उद्घाटन झालेल्या या भूमीतून अनेक गुणवंत खेळाडू घडल्याचे सांगितले.
यावेळी महाविद्यालयाचे प्राचार्य डॉ. अरुण पाटील, कर निर्धारण अधिकारी डॉ. प्रज्ञा पाटील, सांगली जिल्हा तायक्वांदो असोसिएशनचे सचिव सुरेश चौधरी आदी मान्यवरांनी मनोगत व्यक्त केले.
कार्यक्रमात तायक्वांदो, वुशु व स्केटिंग या क्रीडाप्रकारात तालुका, राज्य व राष्ट्रीय स्तरावर यश संपादन केलेल्या विद्यार्थ्यांचा तसेच सेल्फ डिफेन्स प्रशिक्षण घेतलेल्या मुलींचा सत्कार करण्यात आला. तायक्वांदो खेळाडूंनी सादर केलेल्या प्रात्यक्षिकांनी उपस्थितांची मने जिंकली.
कार्यक्रमास नगरसेवक डॉ. प्रकाश आडमुठे, सुभाष खिलारे, सुनील खिलारे, अजित सूर्यवंशी, आकाश पवार, संकेत कांबळे, विनोद राठोड तसेच स्टीफन व स्टीवन काकी यांच्यासह अनेक मान्यवर उपस्थित होते.
कार्यक्रमाचे संयोजन अमृत डवंग व निलेश पाटील यांनी केले. सूत्रसंचालन प्रा. ए. के. पाटील यांनी केले तर आभार प्रा. प्रमोद कुचीवाले यांनी मानले. मोठ्या संख्येने उपस्थित पालक व क्रीडाप्रेमींमुळे कार्यक्रमाला उत्स्फूर्त प्रतिसाद मिळाला.
