गंगाखेड (प्रतिनिधी) : राज्यातील वृत्तपत्र उद्योगास आर्थिक बळकटी देण्यासाठी जाहिरात दरात १५० टक्के वाढ करण्यात यावी तसेच पत्रकारांसाठी विविध प्रशासकीय धोरणांमध्ये सुधारणा कराव्यात, या प्रमुख मागण्यांसाठी ‘व्हॉइस ऑफ मीडिया’ गंगाखेड शाखेच्या वतीने सोमवार, २३ मार्च रोजी उपविभागीय अधिकारी व तहसीलदार यांच्या मार्फत राज्याचे मुख्यमंत्री देवेंद्र फडणवीस यांना निवेदन देण्यात आले.
निवेदनात म्हटले आहे की, वृत्तपत्र उद्योग हा लोकशाहीचा चौथा स्तंभ म्हणून कार्यरत असून शासनाच्या योजना, निर्णय व धोरणे जनतेपर्यंत पोहोचविण्यात महत्त्वाची भूमिका बजावतो. मात्र, गेल्या काही वर्षांत कागद, प्रिंटिंग साहित्य व इतर खर्चात मोठ्या प्रमाणात वाढ झाली असतानाही जाहिरात दरात अपेक्षित वाढ झालेली नाही. त्यामुळे लघु व मध्यम वृत्तपत्रांचे अस्तित्व धोक्यात आले असल्याची चिंता व्यक्त करण्यात आली आहे.
प्रमुख मागण्या :
- जाहिरात दरात १५० टक्के वाढ करण्यात यावी
- ई-टेंडर जाहिराती पूर्ण स्वरूपात वृत्तपत्रांत प्रसिद्ध कराव्यात
- शासकीय जाहिरातींचे बिल ३१ दिवसांत अदा करावे
- लघु व मध्यम वृत्तपत्रांना समान संधी द्यावी
- शासन निर्णयांची माहिती पारदर्शकपणे प्रसिद्ध करावी
- जिल्हास्तरावरील जाहिरात वाटपातील भेदभाव थांबवावा
- सर्व शासकीय जाहिराती माहिती खात्यामार्फत देण्यात याव्यात
या निवेदनावर तालुका अध्यक्ष अन्वर शेख लिंबेकर यांच्यासह शिवाजी कांबळे, अली चाऊस, गोपाळ मंत्री, अंकुश कांबळे, रामप्रसाद ओझा, सय्यद सद्दाम, प्रेम सावंत, राजेश्वर वट्टमवार, मोहसीन खान आदी पदाधिकाऱ्यांच्या स्वाक्षऱ्या आहेत.
या मागण्यांकडे शासनाने गांभीर्याने लक्ष देऊन तातडीने निर्णय घ्यावा, अशी मागणी ‘व्हॉइस ऑफ मीडिया’च्या वतीने करण्यात आली आहे.
