प्रल्हादपुर (परतूर) : श्रीराम नवमी निमित्त प्रल्हादपुर येथे ‘हिंदू एकता दिवस २०२६’ उत्साहात साजरा करण्यात येणार असून गुरुवार, दि. २६ मार्च रोजी भव्य शोभायात्रेचे आयोजन करण्यात आले आहे. यंदा ही शोभायात्रा १३व्या वर्षात पदार्पण करत असून परिसरात उत्साहाचे वातावरण निर्माण झाले आहे.
या शोभायात्रेचे प्रमुख आकर्षण म्हणजे अयोध्या येथील श्रीरामलल्ला यांची सुमारे ८ फूट उंच भव्य बालरूपातील मूर्ती असणार आहे. याशिवाय प्राचीन संबळ पथक, बाहुबली नरसिंह अवतार, भव्य ध्वज पथक, आकर्षक धून, पुष्पवर्षा व दिव्य आतिषबाजी यांसारखी विविध आकर्षणेही यावेळी पाहायला मिळणार आहेत.
शोभायात्रा दुपारी ३.३० वाजता धर्मवीर छत्रपती संभाजी महाराज उड्डाणपूल येथून प्रारंभ होऊन श्री खंडोबा मंदिर (गाव भाग) येथे समारोप होणार आहे. सायंकाळी ५.३० वाजता श्री महादेव मंदिर चौक येथे भव्य महाआरतीचे आयोजन करण्यात आले आहे.
या कार्यक्रमाचे आयोजन समस्त धर्माभिमानी हिंदू बांधव-भगिनी, प्रल्हादपुर (परतूर) यांच्या वतीने करण्यात आले असून नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन आयोजकांनी केले आहे.
