धोंदलगाव प्रतिनिधी :
वैजापूर तालुक्यातील धोंदलगाव येथे पेट्रोल संपणार असल्याच्या अफवेने पेट्रोल पंपांवर नागरिकांची प्रचंड गर्दी उसळल्याचे चित्र पाहायला मिळाले. “आठ दिवस पेट्रोल मिळणार नाही” अशी चर्चा परिसरात पसरताच नागरिकांनी एकाच वेळी पंपांकडे धाव घेतली.
धोंदलगावसह वैजापूर तालुक्यातील दहेगाव, लाडगाव आदी भागांमध्ये पेट्रोल पंपांवर वाहनांच्या लांबलचक रांगा लागल्या होत्या. अनेकांनी आपली दुचाकी व चारचाकी वाहने फुल टँक करून घेतल्याचे दिसून आले.
सायंकाळी आठ वाजेपर्यंत पेट्रोल वितरण सुरू होते. काही नागरिकांनी “लॉकडाऊनसारखी परिस्थिती निर्माण होईल” या भीतीने इंधन साठवण्याचा प्रयत्न केला. मात्र, पेट्रोल खरोखरच संपणार की ही केवळ अफवा आहे, याबाबत नागरिकांमध्ये संभ्रमाचे वातावरण निर्माण झाले होते.
दरम्यान, पेट्रोल पंप कर्मचाऱ्यांनी स्पष्ट केले की उद्याही पेट्रोल उपलब्ध होणार असून पुरवठ्यात कोणतीही मोठी अडचण नाही. केवळ वेळेत थोडा फरक पडू शकतो. त्यामुळे नागरिकांनी अफवांवर विश्वास न ठेवता शांतता राखावी, असे आवाहन करण्यात आले आहे.
