नांदेड (प्रतिनिधी : मोईन):
नांदेड शहरात पेट्रोल-डिझेल तुटवड्याच्या अफवांनी नागरिकांमध्ये संभ्रमाचे वातावरण निर्माण झाले असताना जिल्हाधिकारी राहुल कर्डिले यांनी दिलासा देत स्पष्ट केले की, जिल्ह्यात इंधनाचा कोणताही तुटवडा नाही. सोशल मीडियावर फिरणारे संदेश पूर्णपणे खोटे असून नागरिकांनी त्यावर विश्वास ठेवू नये, असे त्यांनी आवाहन केले आहे.
जिल्हाधिकाऱ्यांनी सांगितले की, काही पेट्रोल पंप तात्पुरते बंद दिसण्यामागचे मुख्य कारण म्हणजे “पॅनिक पर्चेसिंग” आहे. नेहमी मर्यादित प्रमाणात इंधन घेणारे ग्राहक सध्या टँक फुल करून घेत असल्याने पंपांवर अचानक गर्दी वाढत आहे. त्यामुळे उपलब्ध साठा लवकर संपतो आणि टँकर येईपर्यंत काही काळासाठी पंप बंद ठेवावे लागतात.
तसेच, इंधन पुरवठा प्रक्रियेत अलीकडेच बदल करण्यात आले आहेत. पेट्रोल-डिझेल पुरवठा करणाऱ्या कंपन्यांनी अॅडव्हान्स पेमेंट प्रणाली लागू केल्यामुळे टँकर येण्यास काहीसा विलंब होत आहे. पूर्वी टँकर आल्यानंतर काही दिवसांत पेमेंट होत असे, मात्र आता आधीच पेमेंट करावे लागत असल्याने पुरवठा साखळीमध्ये वेळ वाढला आहे.
राहुल कर्डिले यांनी स्पष्ट केले की, नांदेड जिल्ह्यात पेट्रोल व डिझेलचा पुरेसा साठा उपलब्ध आहे. नागरिकांनी अनावश्यक साठेबाजी टाळून शांतपणे आवश्यक तेवढेच इंधन घेतल्यास कोणतीही अडचण निर्माण होणार नाही.
शेवटी प्रशासनाकडून नागरिकांना आवाहन करण्यात आले आहे की, अफवांवर विश्वास ठेवू नये, सोशल मीडियावरील अप्रमाणित संदेश पुढे पाठवू नयेत आणि प्रशासनाला सहकार्य करावे.
