आजरा | प्रतिनिधी :
महाराष्ट्र शासनाच्या वन विभागाकडून सन २०२३-२४ साठी दिला जाणारा मानाचा ‘सुवर्णपदक’ पुरस्कार कोल्हापूरचे मुख्य वनसंरक्षक (प्रादेशिक) जी. गुरुप्रसाद यांना जाहीर झाला आहे. त्यांच्या या उल्लेखनीय कामगिरीबद्दल जिल्ह्यातील विविध क्षेत्रांतील मान्यवरांकडून त्यांचा सत्कार करण्यात आला.
वन विभागातील उत्कृष्ट कामगिरी, प्रभावी प्रशासन आणि निसर्ग संवर्धनासाठी घेतलेल्या प्रयत्नांची दखल घेऊन राज्य शासनाने त्यांना या पुरस्काराने गौरविले आहे. त्यांच्या मार्गदर्शनाखाली कोल्हापूर जिल्ह्यातील वनक्षेत्राचे जतन व संवर्धन प्रभावीपणे करण्यात आले आहे.
विशेषतः वनव्यावर नियंत्रण मिळवण्यात त्यांनी मोठे यश मिळवले आहे. पूर्वी दरवर्षी १ ते १.५ हजार हेक्टर जंगलाचे नुकसान होत असताना, त्यांच्या नियोजनामुळे हे नुकसान कमी होऊन सुमारे ४५० हेक्टरपर्यंत आले आहे. यामुळे वन्यजीवांचे संरक्षण होण्यास मोठी मदत झाली आहे.
या यशाबद्दल सरपंच संघटनेचे जिल्हाध्यक्ष इंजि. जी. एम. पाटील, माजी उपसभापती निवृत्ती कांबळे आणि देवर्डे गावचे उपसरपंच मारुती बुरुड यांनी भेट घेऊन पुष्पगुच्छ व शाल देत त्यांचा सन्मान केला.
या प्रसंगी मान्यवरांनी त्यांच्या कार्याचे कौतुक करत, निसर्ग संवर्धनासाठी त्यांचे योगदान महत्त्वाचे असल्याचे नमूद केले. त्यांच्या या यशाबद्दल जिल्हाभरातून अभिनंदनाचा वर्षाव होत आहे.
