श्रीगोंदा | प्रतिनिधी :
जागतिक ग्राहक दिनानिमित्त श्रीगोंदा तहसील कार्यालयात दि. ३० मार्च रोजी कार्यक्रमाचे आयोजन करण्यात आले. या कार्यक्रमाच्या अध्यक्षस्थानी नायब तहसीलदार मिलिंद जाधव होते, तर ग्राहक पंचायतचे तालुका अध्यक्ष अनंता पवार व पुरवठा अधिकारी कोरे यांची प्रमुख उपस्थिती होती.
कार्यक्रमात ग्राहकांच्या विविध समस्यांवर सविस्तर चर्चा करण्यात आली. सेतू कार्यालयात अधिक शुल्क आकारणे, पेट्रोल पंप व एसटी स्थानकांवरील शौचालयांची दुरावस्था, एसटी कर्मचाऱ्यांकडून प्रवाशांना होणारा त्रास, कृषी सेवा केंद्रांमध्ये जबरदस्ती विक्री, निकृष्ट धान्य वितरण, वीज समस्या तसेच अपूर्ण रस्ते कामे अशा अनेक मुद्द्यांवर नागरिकांनी आपली मते मांडली.
या तक्रारींवर नायब तहसीलदार जाधव यांनी संबंधित अधिकाऱ्यांकडून तत्काळ स्पष्टीकरण घेतले. एसटी आगार प्रमुखांनी तक्रारींवर कारवाई करण्याचे आश्वासन दिले, तर ग्राहक पंचायतच्या वतीने नागरिकांनी तक्रारींसाठी संघटनेशी संपर्क साधण्याचे आवाहन करण्यात आले.
कार्यक्रमास अनेक शासकीय विभागांकडून अपेक्षित प्रतिसाद न मिळाल्याने उपस्थितांमध्ये नाराजी व्यक्त करण्यात आली. काही अधिकाऱ्यांच्या अनुपस्थितीवर निषेध नोंदवण्यात आला, तर काहींनी कार्यक्रमावर बहिष्कारही टाकला.
या प्रसंगी अॅड. रमेश जठार यांनी ग्राहकांचे हक्क व कायदे याबाबत मार्गदर्शन केले. कार्यक्रमाचे सूत्रसंचालन मदन गडदे यांनी केले. विविध मान्यवर, पत्रकार व कार्यकर्त्यांच्या उपस्थितीत कार्यक्रम पार पडला.
