कन्नड (तालुका प्रतिनिधी) : दरवर्षी होळी नंतर सात दिवसांनी मोठ्या दिमाखात भरवला जाणारा हजरत सिद्दीक शहा बाबा उर्स यंदाही उत्साहात पार पडत असून आज (दि. ३० मार्च २०२६) सोमवारच्या बाजारानंतर या उर्साची सांगता होत आहे.
पवित्र रमजान महिन्याच्या पार्श्वभूमीवर भरलेल्या या उर्सात हिंदू आणि मुस्लिम बांधव मोठ्या श्रद्धेने सहभागी झाले. नवस फेडण्यासाठी भाविकांनी खाजा, पेढे, गूळ यांसारख्या वस्तूंमध्ये तोलून आपली मनोकामना पूर्ण केल्याचे पाहायला मिळाले. सिद्दीक शहा बाबा नवसाला पावतात, अशी भाविकांची श्रद्धा आहे.
या जत्रेत पिक्चर टॉकीज, लाड पाळणे (झुले), भांड्यांची दुकाने आदी आकर्षणांचे केंद्र ठरले. तब्बल एक महिना चाललेल्या या उर्सात कव्वाली, तमाशा यांसारखे विविध सांस्कृतिक कार्यक्रम रंगले.
उर्साच्या निमित्ताने लाखोंची उलाढालही झाल्याचे दिसून आले. धार्मिक उत्सवाबरोबरच सामाजिक एकोपा आणि सांस्कृतिक परंपरेचे दर्शन घडवणारा हा उर्स कन्नड शहरात ऐक्याचे प्रतीक म्हणून ओळखला जातो.
