दर्यापूर (प्रतिनिधी – दिपक मेश्राम) : येथील शीतल गॅस एजन्सीच्या कारभारावर वंचित बहुजन आघाडीचे तालुकाध्यक्ष चंदूभाऊ रायबोले यांनी तीव्र नाराजी व्यक्त केली आहे. गॅस वितरणातील अनियमितता आणि ग्राहकांना होणाऱ्या त्रासाच्या पार्श्वभूमीवर त्यांनी आक्रमक भूमिका घेतल्याची माहिती समोर आली आहे.
मिळालेल्या माहितीनुसार, एजन्सीकडून ग्राहकांना वेळेवर गॅस सिलिंडर मिळत नसल्याच्या तक्रारी वाढत आहेत. वितरणात होणारा विलंब, तसेच काही ठिकाणी निर्धारित दरापेक्षा जास्त पैसे आकारले जात असल्याचा आरोप नागरिकांकडून करण्यात येत आहे. याशिवाय ग्राहकांशी उद्धट वर्तन, तसेच घरगुती सिलिंडरचा व्यावसायिक वापर होत असल्याच्या तक्रारींमुळे नागरिकांमध्ये संतापाचे वातावरण निर्माण झाले आहे.
या पार्श्वभूमीवर चंदूभाऊ रायबोले यांनी प्रशासनाकडे लक्ष वेधत गॅस वितरण प्रक्रिया पूर्णपणे पारदर्शक करण्याची मागणी केली आहे. तसेच ग्राहकांची फसवणूक होत असल्यास संबंधित एजन्सीवर कठोर कारवाई करण्यात यावी, अशी मागणीही त्यांनी केली आहे.
सर्वसामान्य नागरिकांना कोणत्याही अडचणीशिवाय गॅस उपलब्ध व्हावा, यासाठी पुरवठा सुरळीत करण्याचे आवाहनही त्यांनी केले आहे. या प्रकरणी प्रशासनाने तातडीने दखल घेऊन योग्य ती कारवाई करावी, अशी मागणी नागरिकांतून जोर धरत आहे.
