दक्षिण सोलापूर (प्रतिनिधी) :
दक्षिण सोलापूर तालुक्यातील कासेगाव येथे बाराव्या शतकातील हेमाडपंथी श्री शंभू महादेव मंदिराची ऐतिहासिक यात्रा आजपासून उत्साहात सुरू झाली आहे. यंदा या यात्रेचे ३७५ वे वर्ष असून मंदिर, शिखर आणि परिसर आकर्षक विद्युत रोषणाईने उजळून निघाला आहे.
कासेगाव व गंगेवाडी येथील मानकरी वाडकर व जाधव परिवार तसेच शिवभक्तांच्या वतीने कावड काठी शिखर शिंगणापूर येथे नेऊन महादेवाला जलाभिषेक करण्याची शेकडो वर्षांची परंपरा आजही जपली जात आहे. यंदाही जलाभिषेक करून कावड काठी गावात परत आणण्यात आली असून, त्यासोबत गावातील अनेक घरांतील मानाच्या लहान काठ्याही सहभागी झाल्या.
यात्रेनिमित्त विविध धार्मिक कार्यक्रमांचे आयोजन करण्यात आले आहे. रोकडे मळा व थोरला मळा येथे भंडाऱ्याचे आयोजन करण्यात आले असून रविवारी सकाळी नगर प्रदक्षिणा काढण्यात आली. सायंकाळी पारंपरिक वाद्यांच्या गजरात करवाढीची मिरवणूक निघणार असून पहाटे मंदिरात सांगता होणार आहे.
सोमवार दि. ६ एप्रिल रोजी यात्रेनिमित्त भव्य कुस्ती स्पर्धेचे आयोजन करण्यात आले असून मोठ्या संख्येने भाविक उपस्थित राहणार असल्याची अपेक्षा व्यक्त केली जात आहे.
