दक्षिण सोलापूर (प्रतिनिधी) :
दक्षिण सोलापूर तालुक्यातील मुस्ती गावातील ग्रामदैवत शेखुबरसाहेब यांच्या यात्रेला आजपासून उत्साहात सुरुवात झाली आहे. हिंदू-मुस्लीम ऐक्याचे प्रतीक म्हणून ओळखल्या जाणाऱ्या या यात्रेमुळे गावात भक्तिमय वातावरण निर्माण झाले आहे.
यात्रेनिमित्त रविवारी दि. ५ एप्रिल रोजी सायंकाळी ७ वाजता लहान संदल मिरवणूक काढण्यात येणार आहे. त्यानंतर मंगळवार दि. ७ एप्रिल रोजी पहाटे ३ वाजता मोठी संदल मिरवणूक गावातून Hazrat Sheikh Umar Sahab Dargah कडे निघणार आहे. याच दिवशी दिवसभर नैवेद्याचे कार्यक्रम आयोजित करण्यात आले असून रात्री ८ वाजता आकर्षक दारूकाम व फटाक्यांची आतिषबाजी होणार आहे.
बुधवार दि. ८ एप्रिल रोजी सायंकाळी ४ वाजल्यापासून राज्यातील नामांकित पैलवानांच्या सहभागाने भव्य कुस्ती फड रंगणार आहे. सोलापूर जिल्ह्यासह राज्यभरातील मल्ल सहभागी होणार असल्याने कुस्तीप्रेमींमध्ये मोठी उत्सुकता आहे.
यात्रा कालावधीत भाविकांसाठी विविध धार्मिक व सांस्कृतिक कार्यक्रमांचे आयोजन करण्यात आले असून या यात्रा महोत्सवाचा लाभ घ्यावा, असे आवाहन मुस्ती यात्रा कमिटी व देवस्थानाच्या मुजावरांनी केले आहे.
