नांदेड, प्रतिनिधी
नांदेड जिल्ह्यात हवामानाने अचानक कूस बदलल्याने नागरिकांमध्ये चिंता व्यक्त होत आहे. कडक उन्हाच्या लाटेनंतर आता अवकाळी पाऊस आणि वादळी वाऱ्यांचा अंदाज व्यक्त करण्यात आला असून, २४ एप्रिल २०२६ पर्यंत ‘येलो अलर्ट’ जारी करण्यात आला आहे.
भारतीय हवामान खात्याच्या अंदाजानुसार, २० ते २४ एप्रिलदरम्यान नांदेडसह मराठवाड्यातील काही भागांमध्ये विजांच्या कडकडाटासह हलका ते मध्यम पाऊस पडण्याची शक्यता आहे. तसेच ताशी ३० ते ५० किमी वेगाने वारे वाहण्याचा अंदाज असल्याने झाडे कोसळणे, पत्रे उडणे अशा घटना घडण्याची भीती व्यक्त होत आहे.
गेल्या काही दिवसांत तापमान ४२ ते ४३ अंश सेल्सिअसपर्यंत पोहोचले होते. मात्र पावसामुळे तापमानात काहीशी घट होण्याची शक्यता असली तरी हवेतील आर्द्रता वाढल्याने उकाडा कायम राहणार आहे.
नागरिकांसाठी खबरदारीचे आवाहन
या पार्श्वभूमीवर प्रशासनाने नागरिकांना सतर्क राहण्याचे आवाहन केले आहे. विजांचा कडकडाट होत असताना झाडाखाली किंवा उघड्यावर थांबू नये, सुरक्षित ठिकाणी आश्रय घ्यावा, असे सांगण्यात आले आहे.
शेतकऱ्यांनी घ्यावी विशेष काळजी
शेतकऱ्यांना कापणी झालेला शेतमाल तातडीने सुरक्षित ठिकाणी हलवण्याचा किंवा ताडपत्रीने झाकून ठेवण्याचा सल्ला देण्यात आला आहे. तसेच पशुधन सुरक्षित ठिकाणी ठेवण्याचेही आवाहन करण्यात आले आहे.
जिल्हा आपत्ती व्यवस्थापन प्राधिकरणाने देखील नागरिकांना सतर्क राहण्याचे आवाहन केले असून, कोणतीही आपत्कालीन परिस्थिती उद्भवल्यास तात्काळ प्रशासनाशी संपर्क साधावा, असे सांगितले आहे.
हवामानातील या अचानक बदलामुळे नागरिकांनी आणि शेतकऱ्यांनी योग्य ती खबरदारी घेणे आवश्यक असल्याचे प्रशासनाने स्पष्ट केले आहे.
