कणकवली (प्रतिनिधी) : माजी केंद्रीय राज्यमंत्री तथा विद्यमान खासदार नारायण राणे यांच्या अमृतमहोत्सवी वाढदिवसानिमित्त हरकुळखुर्द येथे संजय गांधी योजना लाभार्थी व विद्यार्थ्यांसाठी मोफत उत्पन्न दाखला शिबिराचे आयोजन करण्यात आले. जि.प. सदस्य मनोज रावराणे यांच्या सौजन्याने आणि भारतीय जनता पार्टी हरकुळ खुर्द, ग्रामपंचायत हरकुळखुर्द व महसूल प्रशासन कणकवली यांच्या संयुक्त सहकार्याने हा उपक्रम राबविण्यात आला.
दि. १० एप्रिल रोजी या शिबिराचे उद्घाटन जि.प. सदस्य मनोज रावराणे यांच्या हस्ते करण्यात आले होते. या शिबिरात एकाच छताखाली लाभार्थ्यांचे अर्ज स्वीकृत करून त्यांची प्रक्रिया पूर्ण करण्यात आली. दि. २४ एप्रिल रोजी ग्रामपंचायत हरकुळखुर्द सभागृहात माजी जिल्हा बँक अध्यक्ष सतीश सांवत यांच्या हस्ते उत्पन्न दाखल्यांचे वितरण करण्यात आले.
या शिबिरात एकूण ११० संजय गांधी योजना लाभार्थी व विद्यार्थ्यांनी अर्ज सादर केले होते. महसूल प्रशासनाच्या सहकार्याने सर्व अर्जांची छाननी करून लाभार्थ्यांना दाखले वितरित करण्यात आले. यावेळी सरपंच राजन रासम, उपसरपंच सर्वेश दळवी, माजी सरपंच महेश डिचवलकर, माजी उपसरपंच संजय रावले, शक्ती केंद्र प्रमुख राजेंद्र डिचवलकर, महेश दळवी, अविनाश रासम यांसह ग्रामस्थ उपस्थित होते.
या उपक्रमामुळे गरजू नागरिकांना मोठा दिलासा मिळाला असून शासकीय सेवांचा लाभ सुलभपणे उपलब्ध करून देण्याचा प्रयत्न यशस्वी ठरल्याची भावना व्यक्त करण्यात आली.
