कराड (प्रतिनिधी)
कराड एसटी आगार परिसरात महिलांकडून शौचालय वापरण्यासाठी पैसे आकारले जात असल्याचा प्रकार समोर आला असून, यामुळे महिला प्रवाशांमध्ये तीव्र नाराजी व्यक्त होत आहे.
माहितीनुसार, संबंधित शौचालयासाठी शुल्क आकारण्यास मनाई असतानाही प्रत्यक्षात महिलांकडून पैसे घेतले जात आहेत. यापूर्वी राज्याचे मंत्री प्रताप सरनाईक यांनी स्पष्ट निर्देश देत, महिलांकडून शौचालयासाठी पैसे घेत असल्यास संबंधित व्यवस्था तात्काळ बंद करण्याचे आदेश दिले होते. मात्र, या आदेशानंतरही वसुली सुरूच असल्याचे दिसून येत आहे.
या संदर्भात एसटी डेपो व्यवस्थापकांकडे तक्रार करण्यात आली असता, “तुम्ही लेखी तक्रार द्या, त्यानंतर आम्ही कार्यवाही करू,” असे उत्तर देण्यात आल्याची माहिती चव्हाण यांनी दिली आहे. त्यामुळे प्रशासनाच्या भूमिकेबाबतही प्रश्नचिन्ह उपस्थित होत आहे.
प्रवाशांच्या मते, एसटी आगारात मूलभूत सुविधा मोफत आणि सुलभ असाव्यात. विशेषतः महिलांसाठी शौचालयासारख्या अत्यावश्यक सुविधांसाठी शुल्क आकारणे योग्य नसून, तात्काळ कारवाई करून ही वसुली बंद करावी, अशी मागणी होत आहे.
