पाथरी (प्रतिनिधी) : तालुक्यातील जि.प. प्राथमिक शाळा देवनांद्रा (सा.का.प) या शाळेने नवोदय विद्यालय प्रवेश परीक्षेत पुन्हा एकदा उल्लेखनीय यश संपादन करत आपली शैक्षणिक गुणवत्ता अधोरेखित केली आहे. सन 2026–27 या शैक्षणिक वर्षासाठी इयत्ता सहावी प्रवेशासाठी घेण्यात आलेल्या परीक्षेत शाळेचे चार विद्यार्थी यशस्वी ठरले होते.
यात भर म्हणून नुकत्याच जाहीर झालेल्या प्रतीक्षा यादीतून कुमारी श्रेया भानुदास नवघरे हिनेही नवोदय प्रवेश पात्रता मिळवली आहे. त्यामुळे शाळेच्या एकूण पाच विद्यार्थ्यांनी नवोदय प्रवेश मिळवून तालुक्यात आपली ठळक छाप उमटवली आहे.
तालुक्यात एकूण १० विद्यार्थी नवोदय प्रवेश पात्र ठरले असून त्यापैकी तब्बल ५ विद्यार्थी देवनांद्रा शाळेचे आहेत, ही अत्यंत अभिमानास्पद बाब मानली जात आहे. शाळेच्या सातत्यपूर्ण गुणवत्तेचा प्रत्यय देणारा हा निकाल असून गेल्या पाच वर्षांत या शाळेचे २६ विद्यार्थी नवोदयमध्ये निवड झाले आहेत, तर ४५ विद्यार्थ्यांनी पाचवी शिष्यवृत्ती परीक्षेत यश मिळवले आहे.
या यशाबद्दल शाळेचे मुख्याध्यापक महिपाल, मार्गदर्शक शिक्षक प्रकाश पोपळघट, कोळपे, झांजे सर व रोकडे तसेच प्रभारी मुख्याध्यापक भागवत आणि सर्व शिक्षकांचे सर्वत्र कौतुक होत आहे.
यावेळी तालुक्याचे गटशिक्षणाधिकारी राठोड साहेब, केंद्रप्रमुख सानप सर, शाळा व्यवस्थापन समितीचे अध्यक्ष बळीराम गायकवाड व इतर मान्यवर उपस्थित होते.
शाळेच्या या उल्लेखनीय यशामुळे विद्यार्थ्यांमध्ये नवचैतन्य निर्माण झाले असून भविष्यातही अशीच उज्ज्वल कामगिरी करण्याचा निर्धार शिक्षक व विद्यार्थ्यांनी व्यक्त केला आहे.
