सेलू (जि. परभणी) | प्रतिनिधी
राज्याच्या गृह विभागाने गुरुवार, ३० एप्रिल रोजी राज्यातील २१ वरिष्ठ पोलीस अधिकाऱ्यांच्या बदल्यांचे आदेश जारी केले असून, त्यामध्ये परभणी जिल्ह्याच्या पोलीस अधीक्षकपदी पंकज कुमावत यांची नियुक्ती करण्यात आली आहे.
परभणीचे विद्यमान पोलीस अधीक्षक रवींद्रसिंह परदेशी यांची बदली मुंबई येथे राज्य गुप्त वार्ता विभागात उपायुक्त पदावर करण्यात आली आहे. त्यांच्या जागी अमरावती येथील अप्पर पोलीस अधीक्षक म्हणून कार्यरत असलेले पंकज कुमावत आता परभणी जिल्ह्याची जबाबदारी सांभाळणार आहेत.
तसेच, परभणीचे अप्पर पोलीस अधीक्षक सुरज गुंजाळ यांची मालेगाव येथे बदली करण्यात आली असून, त्यांच्या जागी अद्याप कोणाची नियुक्ती करण्यात आलेली नाही. गृह विभागाचे सहसचिव सुग्रीव धपाडे यांनी या बदल्यांचे अधिकृत आदेश जारी केले आहेत.
रवींद्रसिंह परदेशी यांनी आपल्या कार्यकाळात परभणी जिल्ह्यात कायदा व सुव्यवस्था सुरळीत राखण्यासाठी महत्त्वपूर्ण योगदान दिले. त्यांच्या कार्याची दखल घेत नागरिकांनी समाधान व्यक्त केले असून, नव्याने रुजू होणारे पोलीस अधीक्षक पंकज कुमावत यांच्याकडूनही अशीच कार्यक्षमता अपेक्षित आहे.
