कडेगाव | प्रतिनिधी
कडेगाव तालुक्यातील चिंचणी (अं.) येथील गांधी एज्युकेशन सोसायटी, कुंडल संचलित श्री शिवाजी हायस्कूलमध्ये रविवारी, दि. ३ मे रोजी माजी विद्यार्थी मेळाव्याचे आयोजन करण्यात आले आहे. सकाळी ९ ते ११ या वेळेत हा मेळावा पार पडणार आहे.
सन १९५७ मध्ये स्थापन झालेल्या या विद्यालयातून २०२५ पर्यंत शिक्षण घेतलेल्या सर्व माजी विद्यार्थ्यांना या मेळाव्यास उपस्थित राहण्याचे आवाहन करण्यात आले आहे. ग्रामीण भागातील या शाळेतून शिक्षण घेऊन अनेक विद्यार्थ्यांनी विविध क्षेत्रात उल्लेखनीय यश मिळवत शाळेचे व गावाचे नाव देश-विदेशात उज्ज्वल केले आहे.
या मेळाव्याच्या माध्यमातून जुन्या आठवणींना उजाळा देणे, मित्र-मैत्रिणी व गुरुजनांची पुन्हा भेट घडविणे, तसेच शाळेच्या भविष्यातील सोयी-सुविधांसाठी एकत्र येऊन सकारात्मक उपक्रम राबविण्याचा संकल्प करण्यात येणार आहे.
विद्यालयाचे मुख्याध्यापक अरुण सावत यांनी सर्व माजी विद्यार्थी व माजी शिक्षकांनी मोठ्या संख्येने उपस्थित राहून या मेळाव्याला यशस्वी करावे, असे आवाहन केले आहे.
