शिरूर (पुणे) | प्रतिनिधी :
महाराष्ट्र दिनानिमित्त शिरूर नगरपरिषदेच्या प्रांगणात देशभक्तीपूर्ण आणि उत्साहवर्धक वातावरणात ध्वजारोहण कार्यक्रम उत्साहात पार पडला. दरवर्षीप्रमाणे यंदाही नगराध्यक्षा सौ. ऐश्वर्या अभिजीत पाचर्णे यांच्या हस्ते राष्ट्रध्वजाचे विधिवत ध्वजारोहण करण्यात आले.
या प्रसंगी शाळा क्रमांक ५ मधील शिक्षक व विद्यार्थिनींनी सादर केलेले वंदे मातरम् आणि राष्ट्रगीत यामुळे परिसर देशभक्तीने भारावून गेला. उपस्थित सर्व मान्यवरांनी राष्ट्रध्वजाला सलामी देत अभिवादन केले.
कार्यक्रमादरम्यान नगराध्यक्षा ऐश्वर्या पाचर्णे यांनी महाराष्ट्र दिनाचे ऐतिहासिक महत्त्व अधोरेखित करत नागरिकांनी एकजुटीने शहराच्या विकासासाठी योगदान द्यावे, असे आवाहन केले.
नगरपरिषदेचे मुख्याधिकारी प्रीतम पाटील यांनीही प्रशासनाच्या विविध योजनांची माहिती देत शहराच्या प्रगतीसाठी नागरिकांच्या सहकार्याचे महत्त्व सांगितले. उपनगराध्यक्ष मितेश गादीया यांनी उपस्थितांचे आभार मानत सर्वांना कामगार दिनाच्या शुभेच्छा दिल्या.
यावेळी नगरपरिषदेतील सर्व अधिकारी, कर्मचारी, नगरसेवक व नगरसेविका यांचा नगराध्यक्षा यांच्या हस्ते सन्मानपूर्वक सत्कार करण्यात आला. कामगार दिनानिमित्त अधिकारी व कर्मचाऱ्यांना भेटवस्तू देऊन त्यांच्या कार्याचा गौरव करण्यात आला.
तसेच पाणीपुरवठा व विद्युत पुरवठा सभापती तथा नगरसेविका डॉ. सुनीता पोटे यांचा महिलांसाठी केलेल्या उल्लेखनीय कार्याबद्दल विशेष सत्कार करण्यात आला.
कार्यक्रमाच्या आकर्षणाचा केंद्रबिंदू ठरलेल्या सेल्फी पॉइंटवर उपस्थितांनी उत्स्फूर्तपणे फोटो काढत सोहळ्याचा आनंद लुटला.
महाराष्ट्र दिन आणि कामगार दिनाच्या दुहेरी औचित्याने आयोजित या कार्यक्रमातून देशभक्ती, कृतज्ञता आणि सामाजिक एकात्मतेचा संदेश देण्यात आला.
