मुक्ताईनगर (प्रतिनिधी) : तालुक्यातील बेलसवाडी फाटा, मरिमाता मंदिराजवळ आज सकाळी सुमारे ८ वाजण्याच्या सुमारास भीषण अपघात घडला. भरधाव आयशर वाहनाने दिलेल्या जोरदार धडकेत दुचाकीवरील पती-पत्नीचा जागीच मृत्यू झाला, तर त्यांच्यासोबत असलेले एक वर्षाचे बाळ चमत्कारिकरित्या बचावले.
या अपघातातील मृतांची ओळख गजानन हिरामण पाटील व सौ. अश्विनी गजानन पाटील (रा. कोचूर, ता. रावेर) अशी झाली आहे. हे दांपत्य आपल्या एक वर्षाच्या बाळासह द्वारदर्शनासाठी जात असताना हा दुर्दैवी अपघात घडला.
अपघातानंतर परिसरात मोठी खळबळ उडाली असून स्थानिक नागरिकांनी तत्काळ मदतकार्य सुरू केले. घटनेची माहिती मिळताच पोलिसांनी घटनास्थळी धाव घेत पंचनामा सुरू केला आहे.
दरम्यान, अपघाताचे नेमके कारण अद्याप स्पष्ट झाले नसून पोलिसांकडून तपास सुरू आहे. शेवटचे वृत्त हाती आले तेव्हा या प्रकरणी गुन्हा नोंदविण्याची प्रक्रिया सुरू होती.
