बीड प्रतिनिधी – शिरूर कासार तालुक्यातील रायमोहा ग्रामीण रुग्णालयातील आरोग्य सुविधांचा बोजवारा उडाल्याचा आरोप करत शिवसेना (उद्धव बाळासाहेब ठाकरे) गट आक्रमक झाला आहे. रुग्णालयातील गैरसोयींबाबत तक्रारी प्राप्त झाल्यानंतर शिवसेनेचे तालुकाप्रमुख सोपान मोरे आणि उपजिल्हाप्रमुख आजिनाथ खेडकर यांनी प्रत्यक्ष रुग्णालयात जाऊन पाहणी केली.
पाहणीदरम्यान रुग्णालयातील अनेक वार्डमध्ये फॅन बंद अवस्थेत असल्याचे दिसून आले. कडाक्याच्या उन्हामुळे रुग्णांचे हाल होत असून पिण्याच्या पाण्याचीही योग्य व्यवस्था नसल्याचा आरोप करण्यात आला. रुग्णांसोबत आलेल्या नातेवाईकांना पाण्यासाठी भटकंती करावी लागत असल्याचे सांगण्यात आले. तसेच रुग्णालयात कुलर असला तरी त्याचा लाभ मोजक्याच रुग्णांना मिळत असल्याची तक्रार करण्यात आली.
रात्री डासांचा मोठ्या प्रमाणात प्रादुर्भाव होत असून मच्छर अगरबत्ती किंवा प्रतिबंधात्मक साधनांचीही व्यवस्था नसल्याने रुग्णांना झोपणे कठीण होत असल्याचे समोर आले. प्रथमोपचारासाठीही रुग्णांना प्रतीक्षा करावी लागत असल्याचा आरोप शिवसेना पदाधिकाऱ्यांनी केला आहे.
“रुग्णालयाच्या देखभाल-दुरुस्तीसाठी शासनाकडून निधी येतो, मग तो खर्च कुठे होतो?” असा सवाल सोपान मोरे आणि आजिनाथ खेडकर यांनी उपस्थित केला. रायमोहा परिसरातील ८ ते १२ वाड्यांतील नागरिक उपचारासाठी या रुग्णालयावर अवलंबून असल्याचे त्यांनी नमूद केले.
शिवसेना जिल्हाप्रमुख उल्हासभैया गिराम यांच्या आदेशानुसार ही पाहणी करण्यात आल्याचे सांगण्यात आले. तसेच “रुग्णांचे हाल सहन केले जाणार नाहीत. या परिस्थितीस वैद्यकीय अधीक्षक जबाबदार असून त्यांच्यावर तात्काळ निलंबनाची कारवाई करण्यात यावी,” अशी मागणी करण्यात आली.
रुग्णालयातील परिस्थितीत तातडीने सुधारणा न झाल्यास शिवसेनेच्या वतीने तीव्र आंदोलन छेडण्यात येईल, असा इशाराही यावेळी देण्यात आला.
