गैरहजेरीमुळे नागरिक त्रस्त.
मंठा पंचायत समिती कार्यालयातील काही अधिकारी व कर्मचारी नियमितपणे गैरहजर राहत असल्याने सर्वसामान्य नागरिकांना मोठ्या अडचणींचा सामना करावा लागत आहे. विविध दाखले, शासकीय योजना, अर्ज मंजुरी तसेच इतर कामांसाठी नागरिकांना वारंवार कार्यालयाच्या फेऱ्या माराव्या लागत आहेत.
कामात दिरंगाई, नागरिक संतप्त
कार्यालयात वेळेवर कर्मचारी उपस्थित नसल्यामुळे अनेक कामे प्रलंबित राहत आहेत. नागरिक सकाळपासून तासन्तास वाट पाहत असतानाही संबंधित अधिकारी उपलब्ध होत नसल्याने संताप व्यक्त केला जात आहे. “आज या, उद्या या” अशी उत्तरे देत नागरिकांची हेलपाटे सुरू असल्याची तक्रार नागरिकांनी केली आहे.
हजेरी लावून कर्मचारी फरार?
काही कर्मचारी केवळ हजेरी लावून कार्यालयातून निघून जात असल्याची चर्चा नागरिकांमध्ये सुरू आहे. त्यामुळे कार्यालयीन कामकाजावर परिणाम होत असून सर्वसामान्य जनतेचा वेळ आणि पैसा वाया जात आहे.
वरिष्ठांनी लक्ष देण्याची मागणी
मंठा पंचायत समितीतील ढिसाळ कारभारामुळे नागरिकांमध्ये नाराजीचे वातावरण निर्माण झाले आहे. संबंधित वरिष्ठ अधिकाऱ्यांनी तातडीने लक्ष घालून गैरहजर अधिकारी व कर्मचाऱ्यांवर कारवाई करावी, अशी मागणी सर्वसामान्य जनतेतून होत आहे.
