सिंधुदुर्ग | प्रतिनिधी
कुडाळ-मालवण तालुक्यातील कृषी विभागाची खरीप हंगाम २०२६-२७ पूर्वतयारी सभा तसेच मुख्यमंत्री शेत पाणंद रस्ता योजना आढावा बैठक आज मराठा हॉल येथे आमदार निलेश राणे यांच्या अध्यक्षतेखाली उत्साहपूर्ण वातावरणात पार पडली.
या बैठकीत आगामी खरीप हंगामासाठी आवश्यक बियाणे व खतांचा पुरवठा, सिंचन व्यवस्था, कृषी योजनांची प्रभावी अंमलबजावणी, शेतकऱ्यांच्या अडचणी तसेच विविध विभागांमधील समन्वय यावर सविस्तर चर्चा करण्यात आली. शेतकऱ्यांना वेळेत सुविधा उपलब्ध करून देण्यासाठी संबंधित विभागांनी समन्वयाने काम करण्याच्या सूचनाही यावेळी देण्यात आल्या.
तसेच मुख्यमंत्री शेत पाणंद रस्ता योजना अंतर्गत ग्रामीण भागातील शेतकऱ्यांना शेतापर्यंत सुलभ आणि सुरक्षित रस्ते उपलब्ध व्हावेत यासाठी सुरू असलेल्या कामांचा आढावा घेण्यात आला. प्रलंबित कामे तातडीने पूर्ण करण्याबाबतही अधिकाऱ्यांना सूचना देण्यात आल्या.
यावेळी माजी आमदार राजन तेली, जिल्हाप्रमुख दत्ता सामंत, बांधकाम सभापती संतोष साठविलकर, पंचायत समिती सभापती कुडाळ मिलिंद नाईक, कुडाळ तहसीलदार सचिन पाटील, मालवण तहसीलदार गणेश लव्हे तसेच शेतकरी बांधव आणि विविध विभागांचे अधिकारी मोठ्या संख्येने उपस्थित होते.
