तहसीलदार दापोली यांना बिरसा फायटर्स़चे निवेदन
अक्राणी प्रतिनिधी: दापोली येथे आदिवासी समाज भवन (Community Hall) बांधण्यात यावे अशी मागणी बिरसा फायटर्स जिल्हा शाखा रत्नागिरी कडून तहसीलदार दापोली जिल्हा रत्नागिरी यांच्या कडे निवेदन देऊन करण्यात आली आहे.यावेळी बिरसा फायटर्सचे राष्ट्रीय अध्यक्ष सुशिलकुमार पावरा, राज्य महिला प्रतिनिधी चंद्रभागा पवार, अमोल पावरा, दत्तात्रय वाघमारे सह असंख्य कार्यकर्ते उपस्थित होते.
निवेदनात म्हटले आहे की ,बिरसा फायटर्स संघटनेने आदिवासी समाजाच्या सांस्कृतिक आणि सामाजिक गरजा पूर्ण करण्यासाठी समाज भवन (Community Hall) बांधण्याची मागणी गेल्या अनेक वर्षांपासून करत आहे.परंतू आदिवासी समाजाच्या या मागणीकडे प्रशासनाचे सातत्याने दुर्लक्ष होत आहे. या संघटनेने आदिवासी प्रकल्प कार्यालय पेण ता रायगड येथे दिलेल्या निवेदनांमध्येही विविध मागण्या मांडल्या आहेत, ज्यामध्ये आदिवासी समाजासाठी हक्काच्या जागेची मागणी प्रमुख आहे. रत्नागिरी जिल्ह्यात ३० हजार पेक्षा अधिक आदिवासींची मतदार संख्या आहे.तरी अद्याप आदिवासी समाजासाठी समाज भवन बांधण्यात आले नाही.ही एक दुर्दैवाची बाब आहे.
आदिवासी समाजाचे सण, उत्सव, सांस्कृतिक कार्यक्रम आणि सामाजिक बैठकांसाठी स्वतंत्र समाज भवन (Community Hall) बांधण्यात यावे. आदिवासी संस्कृतीचे जतन आणि संवर्धन करण्यासाठी समाज भवन अत्यंत आवश्यक आहे. तरी दापोली येथे आदिवासी समाज भवन (Community Hall) बांधण्यात यावे, अशी मागणी बिरसा फायटर्स संघटनेकडून करण्यात आली आहे.
