प्रतिनिधी :
माणिकवाडा (ता. नेर) : छत्रपती शिवाजी महाराज महा राजस्व समाधान शिबिर अभियान अंतर्गत श्री फकीरजी महाराज संस्थान, धनज येथे आयोजित करण्यात आलेले समाधान शिबिर उत्साहात व यशस्वीरीत्या संपन्न झाले.
या शिबिरात तालुका प्रशासनातील विविध शासकीय विभागांनी सक्रिय सहभाग नोंदवून नागरिकांना विविध सेवा व सुविधा एकाच ठिकाणी उपलब्ध करून दिल्या. महसूल, आरोग्य, पंचायत समिती, कृषी, पोलीस, वन, समाजकल्याण, एकात्मिक बालविकास, एसटी महामंडळ, भूमी अभिलेख, पशुसंवर्धन आदी विभागांनी नागरिकांच्या विविध समस्यांचे तत्काळ निवारण करत मार्गदर्शन केले.
या शिबिरासाठी निरीक्षक म्हणून उपजिल्हाधिकारी अविनाश शिंगटे उपस्थित होते. तसेच उपविभागीय अधिकारी विजय सूर्यवंशी, तहसीलदार पुरुषोत्तम भुसारी, अप्पर तहसीलदार ओमकार एकाळे, महसूल नायब तहसीलदार प्रविण इंगोले, निवासी नायब तहसीलदार विजय बकाले यांची प्रमुख उपस्थिती होती.
तालुक्यातील सर्व मंडळ अधिकारी, ग्राम महसूल अधिकारी व ग्राम महसूल सेवक यांनी शिबिरात सहभाग घेतला. मंडळ अधिकारी देवेंद्र गोगटे यांनी शिबिराच्या यशस्वी आयोजनासाठी विशेष परिश्रम घेतले.
शिबिरामध्ये तालुक्यातील विविध अधिकारी, कर्मचारी तसेच मोठ्या संख्येने शेतकरी बांधव व नागरिक उपस्थित होते. माणिकवाडा महसूल मंडळासह परिसरातील गावांमधून नागरिकांनी उत्स्फूर्त प्रतिसाद दिला.
नागरिकांच्या विविध समस्या जागेवरच मार्गी लागल्यामुळे उपस्थितांनी समाधान व्यक्त केले. शासनाच्या सेवा थेट नागरिकांपर्यंत पोहोचविणाऱ्या या उपक्रमाचे सर्व स्तरांतून कौतुक करण्यात येत आहे.
एकूणच, धनज (माणिकवाडा) येथे आयोजित हे समाधान शिबिर नागरिकांसाठी अत्यंत उपयुक्त ठरून यशस्वीरीत्या पार पडल्याची भावना उपस्थितांनी व्यक्त केली.
