चांदवडजवळ मध्यरात्री भीषण अपघात; प्रवाशांमध्ये एकच आरडाओरड
चांदवड : प्रतिनिधी
चांदवड येथील हॉटेल निकिता जवळ मालेगावकडून नाशिककडे जाणारी लक्झरी बस शनिवार (दि. ९ मे) रोजी मध्यरात्री साडेबारा ते एक वाजेच्या सुमारास भीषण अपघातग्रस्त झाली. भरधाव वेगाने धावणाऱ्या बसचे टायर अचानक फुटल्याने चालकाचे वाहनावरील नियंत्रण सुटले आणि बस रस्त्यावर उलटली.
या भीषण अपघातात पुणे येथील राजेंद्र अमरसिंग सोळुंकी (वय ६०) यांचा मृत्यू झाला असून ७ प्रवासी गंभीर जखमी झाले आहेत. तसेच २० हून अधिक प्रवासी किरकोळ जखमी झाल्याची माहिती मिळाली आहे.
अपघातग्रस्त लक्झरी बस क्रमांक MH-18 BG / 4005 ही मालेगावकडून नाशिकच्या दिशेने जात होती. अचानक टायर फुटल्याने बस डिव्हायडरलगत उलटली आणि प्रवाशांमध्ये एकच आरडाओरड सुरू झाली.
अपघाताची माहिती मिळताच हायवे रुग्णवाहिका, पेट्रोलिंग टीम तसेच स्थानिक प्रशासनाने तातडीने घटनास्थळी धाव घेत मदतकार्य सुरू केले. जखमींना तातडीने चांदवड येथील ग्रामीण रुग्णालयात दाखल करण्यात आले. गंभीर जखमींवर प्राथमिक उपचार सुरू असून काहींना पुढील उपचारासाठी जिल्हा रुग्णालयात हलविण्याची शक्यता व्यक्त करण्यात येत आहे.
अपघातामुळे काही काळ वाहतूक विस्कळीत झाली होती. हायवे रिकव्हरी क्रेनच्या मदतीने अपघातग्रस्त बस रस्त्याच्या बाजूला हटवून वाहतूक सुरळीत करण्यात आली.
या प्रकरणी चांदवड पोलीस ठाण्यात नोंद करण्यात आली असून पुढील तपास सुरू आहे.
जखमी प्रवाशांची नावे :
शोभा विजय बिरारी (रा. रावळगाव), पंकज मनोहरसिंग पाटील (रा. पुणे), नितीन वामन कु-हाडे (रा. वणी), विजय तुळशीराम बिरारी (रा. रावळगाव), राजेंद्र अमरजित सोळंकी (रा. पुणे), दर्शन भगवान पाटील (रा. पुणे), मिथून तापीराम गिल (रा. आरवी), जयश्री चंद्रकांत पाटील (रा. आरवी), संगिता भगवान पाटील (रा. चुंबाळे), देवयानी पंकज पाटील, कल्पना अशोक चिले (रा. आरवी), तुषार तापीराम गिल (रा. पुणे), निंबा शिवाजी पाटील (रा. वणी, धुळे), मेघश्याम सुनील दंगल (रा. सटाणा), भूषण ताराचंद पाटील (रा. चोपडे), वंदना दिला चव्हाण (रा. पुणे), रेखा करण सोनवणे (रा. सांगवी), अरबाज भिका मेहलाल (रा. शिरपूर), मयूर सूर्यभान जाधव (रा. चांदवड), मनोज सोपान गांगुर्डे (रा. दिघवद), आदित्य राजेंद्र पाटील (रा. पुणे), गौरव कांतीलाल सांळुके (रा. धुळे), दत्तात्रय हनुमंत बर्डे (रा. पुणे), वैष्णवी राजेंद्र पाटील (रा. पुणे), अशोक रुपचंद चित्ते (रा. पुणे), जयदीप सिसोदिया (रा. पुणे), अनिता पाटील (रा. पुणे) आदी प्रवासी जखमी झाले आहेत.
दरम्यान, सोमा टोलचे कर्मचारी निलेश कुलकर्णी, संजय ठाकूर, मिजान घासी, संदेश जाधव, सागर आढाव, तुषार आहिरे, शाहीद कुरेशी व अनिकेत निरभवणे यांनी मदतकार्यात सहभाग घेतला. तसेच पोलिस निरीक्षक कैलास वाघ आणि चांदवड पोलिसांच्या पथकाने घटनास्थळी पंचनामा करून वाहतूक सुरळीत केली.
