इंदापुर:
इंदापूर तालुक्यातील सपकळवाडी (संजयनगर) येथील रहिवासी उमेश बाळचंद सपकळ यांनी पुणे ग्रामीण पोलीस अधीक्षक कार्यालयासमोर आत्मदहन करण्याचा इशारा दिल्याने परिसरात खळबळ उडाली आहे. सहाय्यक पोलीस निरीक्षक राजकुमार डुणगे यांच्यावर खोटे गुन्हे दाखल करणे, तक्रारींकडे जाणीवपूर्वक दुर्लक्ष करणे तसेच पदाचा गैरवापर केल्याचे गंभीर आरोप त्यांनी केले आहेत.
उमेश सपकळ यांनी फौजदारी प्रक्रिया संहिता (CRPC) कलम 154 अंतर्गत सविस्तर तक्रार दाखल करून विविध घटनांची माहिती वरिष्ठ अधिकाऱ्यांना दिली आहे. आपल्या कुटुंबीयांवर खोटे गुन्हे दाखल करण्यात आले असून, विरोधकांना संरक्षण दिले जात असल्याचा आरोप त्यांनी तक्रारीत केला आहे. तसेच अनेक वेळा पोलीस स्टेशनमध्ये जाऊनही त्यांच्या तक्रारींची योग्य दखल घेतली गेली नसल्याचे त्यांनी नमूद केले आहे.
तक्रारीनुसार, शेतातील रस्ता, वाद, धमक्या, मारहाण तसेच महिलांविषयी गैरवर्तन अशा विविध घटनांबाबत पुरावे, व्हिडिओ व लेखी अर्ज सादर करूनही पोलिसांनी कोणतीही ठोस कारवाई केली नसल्याचा दावा करण्यात आला आहे. संबंधित अधिकाऱ्यांच्या दबावामुळे पोलीस स्टेशनमध्ये सामान्य नागरिकांच्या तक्रारी घेतल्या जात नसल्याचाही आरोप करण्यात आला आहे.
यासंदर्भात उमेश सपकळ यांनी पुणे ग्रामीण पोलीस अधीक्षक संदीपसिंह गिल यांना निवेदन देऊन संबंधित अधिकाऱ्यांवर विभागीय चौकशी करून कारवाई करण्याची मागणी केली आहे. तसेच वेळेत न्याय न मिळाल्यास पुणे ग्रामीण पोलीस अधीक्षक कार्यालयासमोर पेट्रोल ओतून आत्मदहन करण्याचा इशारा त्यांनी दिला आहे.
दरम्यान, या प्रकरणामुळे इंदापूर तालुक्यात चर्चा रंगली असून, प्रशासनाने या गंभीर आरोपांची निष्पक्ष चौकशी करून सत्य समोर आणावे, अशी मागणी स्थानिक नागरिकांकडून होत आहे.
