प्रतिनिधी : वाशीम
जिल्ह्यातील कृषी उत्पन्न बाजार समित्यांमध्ये सोयाबीनच्या दरात सातत्याने वाढ होत असून, सोयाबीनने प्रती क्विंटल सात हजार रुपयांचा टप्पा ओलांडला आहे. वाशीम कृषी उत्पन्न बाजार समितीत सध्या सोयाबीनला किमान ७ हजार ते कमाल ७ हजार ४०० रुपये दर मिळत असल्याचे दिसून येत आहे.
दरम्यान, अल्प व मध्यम भूधारक शेतकऱ्यांनी आर्थिक गरजेमुळे यापूर्वीच कमी भावात सोयाबीनची विक्री केली होती. त्यामुळे सध्याच्या दरवाढीचा त्यांना अपेक्षित लाभ मिळू शकलेला नाही. दुसरीकडे मोठे शेतकरी आणि व्यापारी यांनी मोठ्या प्रमाणात माल साठवून ठेवला असून, आगामी काळात आणखी दरवाढ होण्याची शक्यता व्यक्त केली जात आहे.
बाजारातील या तेजीमुळे व्यापारी वर्गाला मोठा फायदा होत असल्याची चर्चा शेतकरी वर्तुळात सुरू आहे. सोयाबीनचे दर आणखी वाढतील का, याकडे आता शेतकऱ्यांचे लक्ष लागले आहे.
