स्कूल ऑफ आर्टिलरी, देवळाली कॅम्पतर्फे महत्त्वाची सूचना जारी
प्रतिनिधी :: नाशिक :
स्कूल ऑफ आर्टिलरी, देवळाली कॅम्प येथे १८ मे २०२६ रोजी सकाळी ८ ते दुपारी ४ वाजेपर्यंत तोफखाना व मैदानी गोळीबाराची प्रात्यक्षिके आयोजित करण्यात आली आहेत. या प्रात्यक्षिकांमध्ये जिवंत दारुगोळ्याचा वापर करण्यात येणार असल्याची माहिती प्रशासनाकडून देण्यात आली आहे.
या पार्श्वभूमीवर इगतपुरी व नाशिक तालुक्यातील काही भाग ‘डेंजर झोन’ म्हणून घोषित करण्यात आले असून नागरिकांनी त्या परिसरात जाणे टाळावे, असे आवाहन करण्यात आले आहे. तसेच पाळीव जनावरेही संबंधित भागात नेऊ नयेत, असे स्पष्ट करण्यात आले आहे.
युद्धप्रयोग, मैदानी गोळीबार आणि तोफखाना सराव अधिनियम १९३८ च्या कलम १० (२) अंतर्गत हा आदेश लागू करण्यात आला आहे. प्रशासनाच्या सूचनांचे उल्लंघन करणाऱ्यांवर कायदेशीर कारवाई करण्यात येणार असल्याचा इशाराही देण्यात आला आहे.
विनापरवाना प्रतिबंधित क्षेत्रात प्रवेश करणे, सूचनांकडे दुर्लक्ष करणे किंवा सरावात अडथळा निर्माण करणे हा दंडनीय अपराध मानला जाणार आहे. नियम मोडून प्रवेश केल्यामुळे कोणतीही जीवित किंवा वित्तहानी झाल्यास त्याची जबाबदारी शासनावर राहणार नसल्याचेही प्रशासनाने स्पष्ट केले आहे.
नागरिकांनी प्रशासनाला सहकार्य करावे आणि सुरक्षिततेच्या दृष्टीने जारी करण्यात आलेल्या सर्व सूचनांचे पालन करावे, असे आवाहन अपर जिल्हाधिकारी तथा निवासी उपजिल्हाधिकारी, नाशिक यांनी केले आहे.
