राजुरा प्रतिनिधी
राजुरा विधानसभा क्षेत्राचे माजी आमदार तथा गडचांदूर शिक्षण प्रसारक मंडळाचे संस्थापक ज्येष्ठ नेते ॲड. विठ्ठलराव धोटे यांचे आज सकाळी ६ वाजता वृद्धापकाळाने दुःखद निधन झाले. त्यांच्या निधनाने राजुरा विधानसभा क्षेत्रासह सामाजिक, शैक्षणिक आणि राजकीय क्षेत्रात हळहळ व्यक्त होत आहे.
त्यांची अंत्ययात्रा पेट वार्ड येथील त्यांच्या निवासस्थानावरून सायंकाळी ६ वाजता निघणार असून भवानी मंदिर, राजुरा येथील मोक्षधाममध्ये त्यांच्या पार्थिवावर अंत्यसंस्कार करण्यात येणार आहेत.
स्व. ॲड. विठ्ठलराव धोटे यांनी आपल्या राजकीय आणि सामाजिक कार्यकाळात राजुरा विधानसभा क्षेत्राच्या विकासासाठी मोलाचे योगदान दिले. अभ्यासू, दूरदृष्टी असलेले आणि जनतेच्या प्रश्नांसाठी सदैव तत्पर राहणारे नेतृत्व म्हणून त्यांची ओळख होती. सर्वसामान्य जनतेशी जिव्हाळ्याचे नाते जपत त्यांनी शिक्षण, सामाजिक कार्य आणि विकासकामांना नेहमीच प्राधान्य दिले.
गडचांदूर शिक्षण प्रसारक मंडळाच्या माध्यमातून त्यांनी शैक्षणिक क्षेत्रातही मोठे कार्य उभे केले. त्यांच्या कार्याची आणि सेवाभावी व्यक्तिमत्त्वाची आठवण सदैव प्रेरणादायी राहील, अशा भावना विविध स्तरांतून व्यक्त होत आहेत.
त्यांच्या आत्म्यास चिरशांती लाभो आणि परिवारास तसेच त्यांच्या समर्थकांना या दुःखातून सावरण्याची शक्ती मिळो, अशी श्रद्धांजली व्यक्त करण्यात येत आहे.
