गडचिरोली | प्रतिनिधी
गडचिरोली जिल्ह्यात गुरुवारी सकाळी मुरखळा (नवेगाव) परिसरात एक भीषण बस अपघात घडला. गडचिरोलीहून उमरखेडकडे प्रवाशांना घेऊन जाणारी भरधाव बस चालकाचे नियंत्रण सुटल्याने रस्त्याच्या कडेला पलटी झाली. या दुर्घटनेत दोघांचा जागीच मृत्यू झाला असून अनेक प्रवासी गंभीर जखमी झाले आहेत. जखमींमध्ये एका वर्षाच्या चिमुकल्याचाही समावेश असून त्याची प्रकृती चिंताजनक असल्याची माहिती समोर आली आहे.
मिळालेल्या माहितीनुसार, मुरखळा (नवेगाव) परिसरातील धोकादायक वळणावर बसवरील चालकाचे नियंत्रण सुटले. भरधाव वेगातील बस अचानक पलटी झाल्याने प्रवाशांमध्ये एकच आरडाओरडा सुरू झाला. अपघात इतका भीषण होता की बसमधील अनेक प्रवासी आतमध्ये अडकून पडले.
घटनेचा आवाज ऐकताच परिसरातील स्थानिक नागरिकांनी तातडीने घटनास्थळी धाव घेतली. नागरिकांनी कोणतीही मदत येण्याची वाट न पाहता स्वतः बचावकार्य सुरू केले. बसमध्ये अडकलेल्या जखमी प्रवाशांना बाहेर काढून जिल्हा सामान्य रुग्णालयात उपचारासाठी दाखल करण्यात आले. स्थानिकांच्या तत्परतेमुळे अनेकांचे प्राण वाचल्याचे बोलले जात आहे.
दरम्यान, घटनेची माहिती मिळताच स्थानिक आमदार डॉ. नरोटे यांनी तातडीने जिल्हा सामान्य रुग्णालयात भेट देत जखमींची विचारपूस केली. तसेच वैद्यकीय अधिकाऱ्यांना जखमींवर तातडीने आणि सर्वोत्तम उपचार करण्याच्या सूचना दिल्या.
या दुर्घटनेमुळे संपूर्ण गडचिरोली जिल्ह्यात हळहळ व्यक्त होत असून पोलिस प्रशासनाकडून अपघाताचा पुढील तपास सुरू आहे.
